Törkiyä ilbaşınıñ saylaw manifestı häm tışqı säyäsät

Törkiyä ilbaşı Räcäp Tayyip Ärdoğan üzeneñ wä “Ğadälat häm qalqınu” partiyäseneñ saylaw manifestın açıqladı. Älege manifestta  ilbaşı Ärdoğan belän “Ğadälät häm qalqınu” partiyäseneñ iq’tisad,sälamätlek saqlaw häm êçke säyäsät belän bäyle şaqtıy wäğ’däse urın ala. Fäqät’ saylaw manifestı şul uq waqıtta 24 nçe iyün’däge saylawda ilbaşı Räcäp Tayyip Ärdoğan saylanğan oçraqta Törkiyä tışqı säyäsäteneñ maqsatları häm alım-ısulların da çağıldıra.

Sӓyӓsӓt, iq’tisad hӓm ictimaği tikşerenülӓr waqıfı SETA tikşerenüçe, yazuçı Can Acunnıñ mӓs’ӓlӓ belӓn bӓyle añlatmasın tӓq’dim itӓbez.

Törkiyäneñ kiläse barışta tışqı säyäsättäge iñ möhim mäs’älälärennän berseneñ terrorğa qarşı köräş buluı qatğıy. İlbaşı Räcäp Tayyip Ärdoğan 15 nçe iyül’däge tüntäreleş kereşüennän soñ yasağan belderüendä terrorğa qarşı köräşneñ Törkiyä êçendä genä qalmawın,terror çığanağında  çik ar’yağınıñ da maqsat itep alınuın beldergän ide.

Başta “Färat qalqanı” xäräkäte häm İrekle Süriyä armiyäse belän Törkiyä çik buyın “DEAŞ”tan çistartqan Törek Qorallı Köçläre soñraq “Zäytün botağı” xäräkäte belän Süriyäneñ Afrin ilçäsen “PKK/YPG” terrorçılarınnan arındırdı.  Ayıruça “Färat qalqanı” xäräkäte Törkiyäneñ terrorğa qarşı köräşendäge yaña totışınıñ küpme däräcädä döres buluın Törkiyädä “DEAŞ” höcümnäreneñ ozaq waqıt küzätelmäwe belän bik açıq kürsätä. Şulay uq Törkiyädä terrorğa qarşı köräştä zur tırışlıq kürsätüçe iminlek köçläre häm küzläw oyışması şaqtıy terror höcümen totqarlap qaldı. “Zäytün botağı” xäräkäte belän “PKK/YPG” terror oyışmasınıñ Amanos tawları aşa Hatay töbägenä ütep kerüe dä totqarlandı.

Törkiyä ilbaşı Räcäp Tayyip Ärdoğannıñ saylaw manifestı nigezendä 24 nçe iyün’nän soñ terrorğa qarşı yaña çik  ar’yağı xäräkätläre kötelä. Xäzerge waqıtta “PKK”ga qarşı Ğıyraqta alıp barıluçı xärbi operaśiyälärneñ kiläçäktä dä däwam itüe küzdä totıla. Terrorğa qarşı köräş qısasında Süriyäneñ tön’yağında “YPG/PKK”ga qarşı yaña xärbi xäräkätlär dä Törkiyäneñ plannarı arasında urın ala.

Törkiyä ilbaşı Räcäp Tayyip Ärdoğan açıqlağan saylaw manifestı bäyläneşendä Törkiyäneñ beräwneñ dä buysınuın qabul itmäwenä häm beräwgä dä baş imäwenä basım yasala. Törkiyäneñ bu totışı könbatışlı şaqtıy ilne tınıçsız itsä dä böten dönyada häm töbäktä üz milli mänfäğät’lären küzdä totqan Törkiyäneñ bäysez tışqı säyäsäte däwam itä.

İlbaşı Ärdoğannıñ Törkiyäne global’ aktyer itep bäyäläwe Törkiyäneñ bu bäyläneştäge maqsatların bik açıq räweştä kürsätä. Fäqät’ Törkiyä beräwneñ dä buysınuın qabul itmägän kebek beräwgä dä baş imi. Ayrıça Törkiyäneñ êkspluataśiya, izügä tügel, xörmät itü häm yärdämgä nigezlängän Afrika säyäsäte monıñ iñ konkret ürnäklärennän berse. Törkiyäneñ dönyada milli tulayım tabışqa kürä iñ küp humanitar yärdäm başqarğan il buluı Törkiyäneñ humanitar tışqı säyäsäteneñ dälile bulıp tora.

Törkiyäneñ aktiv tışqı säyäsäteneñ däwam itterelä ala torğan buluı häm kamilläşüe öçen Törkiyäneñ bäylelegen kimetü häm strategik möhimlegen arttıru kiräk. Bu bäyläneştä Törkiyäneñ saqlanu sänäğäte zur ähämiyätkä iyä. Şuña kürä ilbaşı Räcäp Tayyip Ärdoğannıñ saylaw manifestında saqlanu sänäğäte kiñ urın alıp tora.

 Törkiyä 2011 nçe yıldan başlap bügenge köngä qadär sänäğät’ êksportın 90%qa arttırıp dönyada iñ küp qoral êksportı başqarğan däwlätlär arasında 18 nçe urınğa kütärelde. Törkiyä şul uq waqıtta saqlanu sänäğätendä çitkä bäylelekne 80%tan 30 %qa töşerde. Kiläçäktä Törkiyäneñ saqlanu sänäğätendäge üseşeneñ artıp däwam itüe kötelä. Ayıruça keşesez hawa apparatlarında Törkiyä dönya külämendä zur uñışqa ireşte.

Törkiyä - dönyada üz qorallı keşesez hawa apparatın êşläp çığara aluçı 6 ildän berse.İlbaşı Räcäp Tayyip Ärdoğannıñ “Yörtüçesez tank êşläp çığaraçıqbız” digän süzläre Törkiyäneñ möhim texnologiyälärdä fiker häm yañalıq alıp kilüçe ähämiyätle aktyer buluın kürsätä.

Törkiyäneñ saqlanu sänäğätendä nığuı, üsüe Törkiyäneñ tışqı säyäsättäge aktivlığın arttıra. Dus häm berlektäş däwlätlär öçen qoral aluda möhim al’ternativa bulğan Törkiyä xalıqara bazarda üz urının aldı. Törkiyäneñ köbäle texnika êksportı Afrikadan, Farsı qultığı häm Urta Aziyadan Malayziyağa qadär suzıla. Törkiyä şulay uq Paqıstanğa “ATAK” boralağı häm köymä, Katarğa “Bayraktar TB2”qorallı keşesez hawa apparatı sata. Bu isä Törkiyä iq’tisadına köç östi,ARGE tikşerenülären köçäytä häm Törkiyäneñ tışqı säyäsättäge aktivlığın arttıra.