Nogayça 118: Hazret-i Paygambar’dıñ (as) bereket mucizeleri (6)

Ontörtünşi bîr misal,     

Nav mucize bolgan:

Basta Buhari, Müslim    

Degen abıraylı kitaplar,

Nav bereket mucizesin    

Yazıp bizge bildirgen:

Hazret-i Cabir’diñ     

Atası ölgende    

Artında bîr neşe

Boruşlar taslap ketken...  

Borşlanganı kisiler,    

Yahudiler eken.

Cabir(ra) atasından qalgan      

Barı mallardı berse,

Gene borşqa yetpegen.

Em alıyaqlı Yahudiler,

Soga razı kelmegen...

Ene sosı almen qalsa,      

Bavındaqı meyvalardı

Qaş sene beriyek bolsa,   

Borş tölegeni bolmagan...

Rasül Ekremaleyhisselam:   

“Bavdan şıqqan meyvalardı,

Üzüp harman etiniz!”            

Dep onlarga buyurgan...

Harman işinde kezinip          

Bereketke duva qılgan...

Soñda Cabir(ra) so harmandan        

Atasının borşınıñ

Köteresin tölegen...

Borşlarını bergen soñ 

Bîr sanelik maqsul qadar

Meyvalar artıp qalgan...

Bîr rivayette tagı em, 

Borşlarına bergen qadar

Sosı maqsul artqan qalgan!

Nav alden borş iyyesi 

Yahudiler hayret etip 

Barı şaşanlap qalgan...

Ene aşıq, abıraylı,   

Bilingen nav mucize,

Yalgız Cabir’dey (ra)sahabediñ       

Rivayeti bolmagan...

Haqıyqatta manevi     

Tevatür ökmünde,     

Mucizedi körgen

Köp ademlerdiñ atına    

Cabir (ra) mucizedi aytqan...

Ol mucizediñ artında  

Onı körgen kim bolsa  

Barı şayiti bolgan..

Onbesinşi bîr misal:    

Basta Tirmizi tagı      

İmam-ı Beyhaki’dey

Diqqatlı alimler,      

Hazret-i Ebu Hureyre’den (ra)

Tuvrasına nakilmen      

Nav kepte qabar bergen:

“Bîr sogısta müslümanlar,    

Azıqları tavsilgenge  

Baresi aş qalgan... 

Basqa rivayette ol sogıs,  

Tebuk gazvesi bolgan.

Rasül Ekremaleyhisselam,  

“Qolda bîr zat bar ma?” dep

Sahabege buyurgan.     

Ebu Hureyre de Paygambar’ga (as),

“Heybede azanaqay        

Hurma bar.” dep aytqan.

-Bîr rivayette so hurmalar,   

Anca on bes dene bolgan-

Paygambaraleyhisselam da      

“Sonı akel!” dep buyurgan.

Soñda hurma heybesine       

Qolın tıgıp hurmadan

Bîr uvıs şıgargan;           

Em bereketke duva qılgan.

Artından onar onar,      

Askerlerdi şaqırgan;

Barı ordu so hurmadan     

Aşayberip em toygan.

Soñda Ebu Hureyre’ge (ra),     

Rasülüllah(as) dep buyurgan:

“Akelgenindi alıp ket!  

Arüv ıslayberip saqla,  

Em de onı bosaltpa!”

Ebu Hureyre qolını,   

So heybege tıqqanda   

Avvel akelgeninşe

Qolına hurma kelgen.

Soñda Paygambar yaşavında,     

-Salat selam bolsun oga-

Em Ebu Bekir, Omar,    

Em Osman hayatında,  

-Allah razı bolsun onlardan-   

Ol hurmalardan aşagan.

Basqa bîr rivayette em     

So hurmalardan qaş yük

Allah üşün dagıtqan!

Soñda Hz. Osman’dıñ    

Şeyid bolgan vaqtında,

Sosı hurma heybesi,        

Urlanganga yoytulgan...

Mine nav mucize, 

Kainattıñ gocası,  

Alemlerdiñ maqtaganı

Paygambaraleyhisselam’dıñ;   

Bîr kudsi madresesi,  

Em tekkesi bolgan    

Suffe’diñ temirbas

Eñ mühim soqtası,  

Em qıymatlı müridi;    

Em zeyninin aşıqlıgı,

Tagı quvvatlı bolganına 

Paygambar’dıñ duvası  

Bolgan Ebu Hureyre’diñ,   

-Allah razı bolsun ondan-

Em Tebuk Sogısında   

Bîr köp sahabe işinde

Qabar bergeni nav mucize,

Manevi betten qarasaq     

Bîr ordu sözi qadar   

Em tuvra, em berk bolgan!..

Savlıqpan qalıñız!

Dr. Yusuf ALTINIŞIK

E-mail: altinisikyusuf@gmail.com

Нoгaйчa 118: Һaзрeт-и Пaйгaмбaрьдың (aс) бeрeкeт муҗизeлeри (6) | TRT Тaтaрчa