Nogayça 48: Dua (2)

Meramatlı Allah'qa,

Bizim etken duamız,

Eki türlü bolup turgan...

Bîrinşi bîr duaga:

“Qavli dua” dep aytılgan...

Sözümüz em yürekpen,

Bîr zat tilesek Rab'tan,

“Qavli dua” bolup turgan...

Duadıñ ekinşisi:

Qaysı isti etken bolsaq,

Är bîr etken isimiz,

Özi dua bolup turgan...

So duaga em bîr yaqtan:

“Fiili dua” dep aytılgan...

Misal bolsa sabanşı,

Tarlasını süreberip

Urlıgını şaşqanda,

Sabanşıdıñ so isi,

Bîr yaqtan em dua bolgan.

Sebebi sabanşıdıñ

Aşap turgan rızqını,

Topraq tuvıl Rab bergen!

Yanı bolmay so topraq,

Aqlı, pikri bolmay em,

Bizdi qaydan tanıgan?

Rahmettiñ qaznasına,

Topraq bolgan bîr qapı...

Eginşi de sabanıman

Allah rızık bersin dep

So topraqtı sürgende,

Aqiyqatı so ispen

Rahmet qapısın soqqan!

Aynı so misaldey

Qaysı isti tutqan bolsaq,

Allah'qa dua bolgan...

Basqa bîr misal em,

Bîr soqtadıñ gayratı,

Özi özine dua bolgan...

Rahmetimen ol Allah,

So soqtaga yardam berse,

imtihandı so soqta,

Bajargan em qazangan.

Esimizge bîr sorav,

Kelgen tagı so yerde,

İnsanlardıñ gayratıman

Bolup turgan so isler,

Nüşün dua bolup turgan?

Men gayrat etpesem,

Äş bîr zat bolmagan...

Gayrat menim bolgan soñ,

Menim qazanganlarım,

Nege menim sayılmagan?

Bîrinşioy so yerde;

Bazı zaman yaşavda,

Barı sebep bolsa tamam,

Äş noqsan qalmay em

So is gene bolmagan...

Ademdiñ tilegeni,

Soga nesip bolmagan!

Demek Rabbimiz bizge,

Özi tilep kömek berse,

So is tagı bolup turgan...

Ekinci oy so yerde,

Biz gayrat qılmasaq,

Belli so is bolmagan...

O istiñ mühim şartı,

İslegenim bolup turgan.

Tek sonıman barabar,

Basqa şartlar da bolgan...

Buga misal aytılsa;

Bîr baqşacı baqşadıñ

Suv yolagın qapatsa,

Ol baqşadıñ baresi,

Qurup baqşa bolmagan.

So baqşacı aytsa kım,

“Men bolmasam baqşadan,

Äş bîr zaman sizlerge,

Meyva zebze bolmagan...”

Baqşacıdıñ so yerde,

Eksik qalgan sözi bar:

Nege desek ol baqşa,

Sudan basqa; topraqqa,

Künden kelgen şuvaqqa,

Taga neşe miñ türlü,

Barı zatqa muqtaj bolgan...

Baqşaga berilgen su,

So şartlardan bîr şart bolgan...

Em artıgın oylasaq;

Eger suvdı bîr terek,

Sorup talga bermese,

Su, yapraqqa yetpese,

So baqşıvan neşe su,

Berse payda bolmagan...

Baqşıvandıñ etkeni,

Baqşagaşem kelse su,

Özi yolaq tıqamay

Suvdıñ avzını aşqan.

Bîr zattıñ bolması ,

Neşe şartqa baylı bolgan...

Bolmaması üşün de

Tek bîr şart yetip qalgan...

Bütün şartlar bolsa tagı

Allah'tıñ tilemesi,

Esas şart bolup turgan!

So sebepten är zaman,

Är daim barı qullar,

Duaga muqtaj bolgan...

Savlıqpan qalıñız!

Dr. Yusuf ALTINIŞIK

E-mail: altinisikyusuf@gmail.com