Awraziya kiñlegendä 07

Törkiyä premyer - ministrı Äxmät Dawıtoğlu ağımdağı yılnıñ 6 nçı fevralendä Qazaqstan Cömhüriyäte premyer-ministrı Kärim Masimovnıñ çaqıruı buyınça Astanağa ber könlek räsmi säfär yasadı. Älege säfät - Äxmät Dawıtoğlunıñ premyer-ministr sıyfatında Qazaqstanğa berence säfäre .Dawıtoğlunıñ räsmi säyäxäte bıyıl çit ildän Qazaqstanğa yasalğan berence yuğarı däräcäle oçraşu bularaq ta zur ähämiyätkä iyä. Törkiyä premyer-ministrınıñ Qazaqstan säfärendä urınbasarı Tuğrul Türkäş, iqtisad ministrı Mostafa Älitaş,transport häm elemtä ministrı Binali Yıldırım ,xalıq ışanıçlıları häm küp sanda byurokrat qatnaştı.

Törkiyä Cömhüriyäte premyer-ministrı Astanada berence bulıp xezmättäşe Kärim Masimov belän üzara häm wäkilleklär arası söyläşülär ütkärde. Qazaqstan xökümäte binasında uzğan söyläşüdä ike yaqlı häm regional mäs'älalär qaraldı. İke il premyer-ministrları soñğı tapqır 2016 nçı yılnıñ 25 nçe ğinwarında Davosta oçraşqan ide.

Soñraq Törkiyä premyer-ministrın Qazaqstan ilbaşı Nursoltan Nazarabayev qabul itte. Akorda sarayında uzğan oçraşuda Dawıtoğlu häm Nazarbayev başta üzara ,annan soñ wäkilleklär qatnaşında söyläşülär ütkärde. Söyläşülärdä Süriyä probleması, Törkiyä –Rusiya mönäsäbätläre häm ike il mönäsäbätläre quzğatıldı. İlbaşı Nazarbayev Qazaqstan öçen Rusiyäneñ dä, Törkiyäneñ dä möhim strategik partner buluın belderde häm ike il mönäsäbätläreneñ cayğa salunın teläde.

Äxmät Dawıtoğlu Qazaqstandağı törek emäkärlar belän dä küreşte. Alarnıñ problemaların tıñlawçı premyer-ministr biredä yasağan çığışında eşmäkärlärneñ ike il arasında küper wazıyfasın başqaruların teläde.

Törkiyä Cömhüriyäte premyer - ministrı Äxmät Dawıtoğlu şul uq könne Astanadağı Törki akademiyägä dä bardı. Dawıtoğlu biredä Qazaqstandağı diplomatlar häm ğalimnär qarşında çığış yasadı. Üz çığışında Yefäk yulınıñ ähämiyätenä tuqtalğan Dawıtoğlu Qazaqstan belän Törkiyäneñ könçığış belän könbatışnıñ qabat ber-berse belän bäyläneş urnaştıruında möhin rollär başqara alacağın ,Yefäk yulınıñ kiläçägeneñ tulısınça üz qullarında buluın belderde. Törek akademiyäse Dawıtoğluna büläklär tapşırdı. Törkiyä premyer-ministrı şul uq könne kiçen Törkiyägä qayttı.

Törkiyä premyer - ministrı Äxmät Dawıtoğlunıñ ber könlek Qazaqstan säfäre söyläşülärneñ eçtälege centekle räweştä açıqlanmasa da küp cähättän bik möhim ide. Berençe çiratta Törkiyä belän Qazaqstan ike yaqlı mönäsäbätlärne yuğarı däräcädä däwam itterergä teli. Säfär qısasında liderlar monı açıq räweştä belderde. Bälki dä monıñ arqasında törle manipulyatsiyalar bulmasın öçen säfär soñğı waqıtqa qadar xäbär itelmäde. Säfär qısasında ike il arasında kileşülär tözelmäwe yäisä tözelsä dä açıqlanmawı Nazarbayevnıñ bıyıl Törkiyägä yasayaçaq säfärendä açıqlanır dip kötelä. Bälki dä yaqlar möhim kileşülärgä ilbaşları qatnaşında qul quyu turında uylağandır.Nigezdä ike il mönäsäbätlären kamilläşteräçäk yaña adımnar yasaw zarur. Xäzerge kürsätkeçlär ike il potentsialınnan küpkä tübän.

Uzğan yıl Qazaqstanda uzğan Törki kiñäşmä şurası häm Törki telle parlamentariylar assambleyası cıyılışlarında Törkiyä yuğarı däräcädä tügel ,wäkil däräcäsendä qatnaştı. Monı qayber dairälär ike il mönäsäbätläre zıyan kürde dip bäyäläde.Törkiyä premyer-ministrınıñ Qazaqstan häm Qazaqstan ilbaşınıñ bıyılğı Törkiyä säfärläre bu fikerlärneñ döres bulmawın kürsätä.

Törki dönyanıñ ike zur ile ,şul uq waqıtta törki cömhüriyätlärneñ integratsiyäsen iñ küp teläwçe ike il bularaq Törkiyä belän Qazaqstan mönäsäbätlärne bar närsägä qaramastan yuğarı däräcädä totarğa tiyeş. Regional integratsiya öçen Törkiyä-Azärbaycan-Qazaqstan öç yaqlı mexanizmın qoru waqıtı küptän citte.

Gölgenä Näfis tärcemäse