Nogayşa 194: Allah üşün süyülse, ahirette aqıbatı ne bolgan? (1)
Süygü Allah üşün bolsa,
Ahiretteki paydaları,
Neticeleri ne bolgan?
So barede bîr alimdiñ
Aytqanından bîr kesek,
Nav aqıyqatlar bolgan:
“Mine sosı şeşit
Alal, tuvra süygülerdiñ
Ahiret’te beriliyek
Bazı neticelerini,
Bîr ‘Baslavış’ kesegi,
Artından ‘Toquz İşaret’pen
Yüzden bîr paydasını,
Endi yıyıstırıp aytamız...
Baslavış:
Cenab-ı Haq,Calallı
Bolgan Qudaylıgıman,
Em yahşı rahmetimen,
Tagı ullı Rablıgıman,
Em yömart maramatı,
Em azamatlı küşimen,
Tagı yahşı, ince, teren,
Hikmetli islerimen
Nav kişkenekey insandıñ
Kevdesini, tenini,
Munşa duygu hislermen,
Em so darece alatlar,
Tagı em cihazlar,
Em şeşitli müşelermen,
Bilmegenimiz kepte,
İnce duygu, maneviyatpan
Ceyizlegen, bezegen...
Ta sosı şeşitli,
Türlü türlü müşemen
Hadsiz nimetleriniñ
Barı şeşitlerini,
İhsan em rahmetiniñ
Neşe tabaqasını,
So insanga bildirsin;
Tättirsin em tanıtsın...
Tagı miñ bîr esmasınıñ,
Yani gözel atlarınıñ,
Ustalıq em öneriniñ
Körilgen soñsız kebini,
Yani tecellilerini,
İnsanlarga so müşelermen
Körsetsin em ölçetsin;
Bîr yaqtan so nimetlermen
Em özini süydürsün!
Mine sosı gayalarman
Yaratılgan müşelerdiñ,
Cihazlar em alatlardıñ
Är bîreviniñ ayrı ayrı
Bîrer qızmat, ibadeti,
Bîrer qullıgı boladı;
So vazipeleri qasında,
Ayrı ayrı nazzeti,
Qaygısı em aşuvı,
Tagı mükäpatı boladı...
Misal bolsa közümüz,
Suvretlerdiñ gözelligin,
Em közge köringen
Nav alemdeki yarasıq
Qudretmucizeleriniñ
Türlü türlü kebini,
Seyir etip köredi.
Sosı közdiñ vazipesi,
İbret qaravışıman
Özini yaratqan Haqq’a
Şükran, teşekkür boladı.
Tagı yalgız sonıñ bolgan
Nazzet, qaygısı em boladı...
Mesela qulaq tagı,
Davislerdiñ türlüsini,
Em yahşı nagmelerdi,
Sosı sesler aleminde,
Cenab-ı Haq’tıñ rahmetiniñ
Gözelliklerini tagı,
Parq etedi, biledi...
Bîr yaqtan sosı qulaqtıñ
Anca öziniñ anlıyagı
Nazzeti, ibadeti,
Em mükäpatı boladı...
Basqa bîr misal em
Qoqu alma qasiyeti,
Qoqular taypasında
Rahmettiñ yahşılıgın
Bilgen soñ yalgızşa
Onıñ etiyegi bîr şükri,
Vazipesi, nazzeti,
Tagı mükäpatı boladı...
Em mesela tildeki
Tät alma duygusu,
Barı aşangan zatlardıñ
Zavqlarını añlayberip
Neşe türlü, manevi
Şükür vazipesin köredi...
Basqa müşelerimiz em,
Qalp, ruh, aqılday
Üyken em köp müyim
Latifelerimizdiñ,
Ayrı ayrı vazipesi,
Nazzet em qaygısı boladı...
Mine Cenab-ı Haq’tıñ,
Rab, Hakim-i Mutlaq’tıñ
Nav insanda vazipe
Bergeni so müşelerge,
Elbet är bîrevine
Tiyisli bîr qarşılıq,
Beriyegi bilinedi...
Yogarlarda aytılgan
Barı şeşit süygüdiñ
Dünyadaqı berilgen
Azirgi neticelerini,
Är kîm vijdanında biledi...
Tagı yürek em esine,
So maneler keledi...
Ahirette beriliyeklerdiñ
Muhaqqaq bolıyagı em
Bîr neşe delillermen
Ispatlanıp körsetiledi...
Em eñ üyken delil,
Sözlerdiñ eñ tuvrası,
Tagı tamam ornında
Manelermen aytılgan;
Patşalar patşası
Aziz em ilmi soñsız
Allah sözi Quran’da
Aytılgan ayetlermen
Qaş yaqtan, qaş türlü,
Eske uygun delillermen
Aşıq etip bildiriledi...”
Aldımızdaqı yumada,
Nav ‘baslavış’ keseginiñ
Artından nasip bolsa,
Süygülerimiz bizim,
Qur’an’ga uygun bolsa,
Ahiretteki aqıbatına
Qaysı işaretler bar eken,
Ol üyken alimdiñ
Aytqanı ‘Togız İşaret’teki
Haqıyqatlardı bildiremiz...
Savlıqpan qalıñız!
Dr. Yusuf ALTINIŞIK
E-mail: altinisikyusuf@gmail.com
