Nepallı al'pinist 1 ayda 2 tapqır rekord yasadı

Nepal al’pinistı Kami Rita dön’yadağı iñ biyek noqta - Êverest tawına 30nçı tapqır mende häm ber ayda ikençe tapqır rekord yasadı. Bu xaqta xökümät wäqalätlese Kim Lal Gautam belderü yasadı. Ul Ritanıñ 8 meñ 848 metr biyeklegendäge tawğa cirle waqıt belän säğat’ 8dä menep citüen äytte. Şulay itep tawçı iñ biyek noqtağa bu ay ikençe tapqır kütärelep rekordın yañarttı häm “Êverestnıñ oçına iñ küp mengän keşe” isemen saqladı.  

54 yäş’lek Rita täwge tapqır Êverestqa 1994nçe yılda kütärelä. 12nçe mayda ul 29nçı menüen başqarğan ide, şunnan soñ 30nçısın da yasadı.

Nepal aprel’dän iyün’gä qadär çordağı kütärelü sezonında 414 al’pinistqa Êverestqa menü röxsäte birgän. Uzğan yıl aña 600dän artıq tawçı kütärelgän, 18e isä hälaq bulğan.