Skorsezeğa "Altın ayu" bireläçäk

74nçe Xalıqara Berlin kinofestivalendä Amerika rejissyerı, sśenariy yazuçı häm prodyusser Martin Skorsezeğa “Altın ayu maqtaw büläge” tapşırılaçaq.

“Berlinale” festivalen oyıştıruçılar beldergänçä, maêstroğa älege premiyä ğomere buyı başqarğan êşçänlekläre öçen birelä. Skorseze dön’yadağı iñ tanılğan rejissyerlarnıñ berse. Anıñ “Taksi yörtüçe”, “Zindan utrawı”, “N’yu-York bandaları” şikelle kartinaları kino dön’yası klassikaları sanala. Skorseze 2007nçe yılda “Mörtät” (Departed) fil’mı belän Oskarğa layıq buldı.

2024nçe yılda 74nçe tapqır uzaçaq kinofestival’neñ oyıştıruçıları belderüdä bolay di: “Skorsezenıñ fil’mnarı tamaşaçı häm keşe bularaq barıbıznı ğomer buyı ozatıp bara, anıñ personajları bezneñ êçebezdä yäşi häm üsä, anıñ tarixqa häm keşelekkä qaraşı kem ikänebezne häm qaydan kilüebezne añlawıbızğa yärdäm itä”.

Festival’neñ bıyıl uzğan tantanasında “Altın ayu maqtaw büläge” Oskarlı rejissyer Stiven Spilbergqa birelgän ide.

Berlinale 2024nçe yılnıñ 15nçe-25nçe fevral’ könnärendä uzaçaq. Ul Kann häm Veneśiyä festival’läre belän berrättän Awrupanıñ iñ ähämiyätle kinofestival’läre arasında. Martin Skorsezeğa büläk tapşıru tantanası 20nçe fevral’dä bulaçaq.