Ramzes İkençeneñ tabutı Parijğa kiterelde

Misırdağı firğawen Ramzes İkençeneñ tabutı Franśiyä başqalası Parijğa kiterelde. Ul 5 ay buyı biredäge ber êkspoziśiyädä kürsäteläçäk. Bu xaqta Misırnıñ Parijdağı ilçese Ala Yosıf citkerde.

Älege tabut 1976nçı yılda da Parijdağı ber kürgäzmägä kiterelgän bulğan. Yaqınça yartı ğasırdan soñ tarixi yädkär qabat şul uq şähärdä.

Misır tışqı êşlär ministrlığınnan belderülärençä, Ramzes İkençeneñ ağaç tabutı Parijdağı kürgäzmä zalına barıp citkän. 5 ay däwam itäçäk êkspoziśiyä 6nçı aprel’dä açıla. Älege çara “Ramzes häm firğawennärneñ altını” iseme astında uzaçaq. Anda Misırğa qarawçı 180 altın tarixi äsärneñ urın alaçağı belderelä.

Misırnıñ ministrlar kabinetı ğıynvar ayında, çığarma räweşendä, Parijda kürgäzmägä quyılaçaq äsärlär arasına Pamzes İkençeneñ tabutın da kertergä röxsät birde.

20le yäş’lärendä täxetkä utırğan älege firğawenneñ Misır belän bezneñ êrağa qadär 1279-1213nçe yıllarda idarä itüe farazlana. Anıñ yähüdlärneñ Misırdan İzrailgä küçenülärenä säbäpçe buluı uylanıla. Ramzes İkençe bik küp saray häm ğıybadätxanälär tözetterä. Alar arasında Abu Simbel dä bar.

Ramzes İkençeneñ 1881nçe yılda tabılğan tabutı başqala Kahirädäge milli muzeyda saqlana.