Tanılğan sänğätçelärdän cirteträwdän zıyan kürüçelärgä yärdäm

“Fondation De France” xezmättäşlege belän Parijdağı Olympia konśert zalında “Cirteträw aldında ber yöräk” iseme belän oyıştırılğan kiçädän alınğan kerem 6nçı fevral’da barlıqqa kilgän häm “Ğasırnıñ fäläqäte” dip bäyälängän Kahramanmaraş êpiśentrlı cirteträwlärdän Türkiyädä häm Süriyädä zarar kürüçelär öçen qullanılaçaq.

“France 2” televideniye kanalınnan turıdan-turı tapşırılğan konśertta pianist Say belän bergä dönyaküläm tanılğan sänğätçelärdän Gims, Zaz häm Patrick Bruel kebek küp sanda isem säxnägä çıqtı häm Türkiyä belän Süriyädäge cirteträwdän zıyan kürüçelär öçen iganä yasarğa çaqırdı.

Konśertta Franśiya mädäniyät ministrı Rima Abdul-Malak ta qatnaştı.

Çara waqıtında zilzilä töbägennän töşerelgän videoyazmalar kürsätelde.

Fazıl Say, konśertta yasağan çığışında çarada qatnaşqan sänğätçelärgä räxmäten citkerde. Say: "Törek watandaşı bularaq franśuz xalqınıñ teläktäşlegen xis itäm,” – dip äytte.

Franśuz sänğätçese Zaz iyün’dä Türkiyädä quyaçaq konśert keremen iganä itäçägen äytte.

Bik küp keşe qatnaşqan kiçädä cıyılğan iganä aqçasınıñ soñğı küläme 2,3 million yevro bularaq açıqlandı.

Yärdäm kampaniyasına öleş kertergä teläwçelär iganäne “Fondation De France”nıñ internet säxifäsennän häm poçta yulı belän kertä ala.