İstanbulda Netflix ofisı açıla

Dön’yada 195 abunäçese bulğan Netflix Törkiyädä üz ofisın aça.

Şirkättän belderülärençä, ul 2021nçe yılnıñ ikençe yartısında êşli başlayaçaq häm yaña êş urınnarı belän täêmin itäçäk. Monnan tış, ofisnıñ Törkiyädä çıqqan uñışlı fil’mnarnı dön’yağa tanıtuda yärdämçe bulaçağı kötelä.

İlneñ mädäniyät häm turizm ministrı Mäxmät Nuri Ärsoy Netfliks şikelle global’ şirkätneñ Törkiyädä ofis açu qararın söyenep qabul itülären belderde. “Bezneñ serial häm fil’mnarnıñ 190 däwlättä qarala aluı tarmağıbıznı xalıqara mäydanda tağın da tanıtaçaq häm fil’m turizmınıñ üseşenä öleş kertäçägen uylıym,”-dide ul.

Netfliksnıñ tözüçese häm yuğarı idaräçese Rid Gastings Törkiyäneñ bay mädäniyäte häm borınğıdan kilgän xikäyäläw tradiśiyäse belän üzläre öçen bik qıymmätle däwlät buluın äytte.  “Şul säbäple iskitkeç qala İstanbulda ofis açuıbız belän ğorurlanabız. Törkiyädäge 3 millionnan artıq abunäçebez häm barlıq akśionerlarıbızğa teläktäşlekläre öçen räxmät,”-di ul.

Netfliks küptän tügel dön’yanıñ här poçmağındağı qarawçılarına Törkiyädä çıqqan fil’mnarnıñ tağın da tizräk barıp citüen täêmin itüçe “Made in Turkey” kollekśiyäsen buldırdı.  Aña maxsus adres (netflix.com/MadeInTurkey) yärdämendä kerergä mömkin. Kollekśiyädä Törkiyädä çığarılğan original’ häm liśenziyäle kartinalarnı 30dan artıq teldä titrlı yäisä dublyajlı qararğa mömkin. Törek fil’mnarın iñ küp qarawçı illär arasında AQŞ, Argentina, Avstraliya, Angliya, Braziliya, Franśiyä, İtaliya, İspaniya, Meksika, Pol’şa häm Soğud Ğaräbstanı bar.