Patarada tağın 2 häykäl tabıldı

Antaliyaneñ Kaş rayonındağı böten dön’yağa tanılğan Patara antik şähärendä arxeologik qazınular waqıtında yözlärçä yıllıq ike häykäl tabıldı.  

Bilgele bulğança, Törkiyä ilbaşı Räcäp Tayyip Ärdoğan tarafınnan 2020nçe yıl Patara yılı dip iğ’lan itelde. Şunnan soñ cirlektä qazınular tuqtawsız däwam itä. Soñğı 2 häykäl belän bergä bıyıl tabılğan tarixi äsärlär sanı 10nan arttı.

Akdeniz universitetınıñ qazınular törkeme başlığı, professor Havva İşkan Işık yaña tabıldıqlar turında sośial’ media akkauntınnan yazma urtaqlaştı. Ul älege äsärlär belän bäyle centekle mäğ’lümatnıñ mädäniyät häm turizm ministrlığı tarafınnan beldereläçägen citkerde.

Uzğan atnada isä antik qalanıñ teatr säxnäse binasındağı qazınularda 1,57 metr biyeklektäge Rim çorına qarawçı başsız häykäl tabıldı.