Ruslar seriallar qarap törekçä öyränä.

Dön’yanıñ bik küp poçmağında qızıqsınu uyatuçı törek serialları qayberäwlärne xisle häm öyrätüçe yağı belän täêsirländerä, ikençelärne isä Törkiyäne kürergä êtärä.

Rusiyä yäş’läre bu nisbättän üzläreneñ kiçereşlären Anadolu agentlığına söyläde.

Sud-mediśina êkspertı Nataliya Kiriçok törek serialların qarağannan soñ törek telen öyränä başlawın belderä. Ul älege fil’mnarda ğailä töşençäseneñ alğı planğa çığuın assızıqlıy.

“Äti-äni - balaların, ir-at qız tuğanın saqlıy. Yäş’lär ölkännärgä xörmät kürsätä, tuğannar ber-bersenä teräk bula. Bolar xäzerge waqıtta bik ähämiyätle,”-di Nataliya. Ul qayber seriallarnı muzıkasın oşatıp qarawın da yäşermi. “Köyläre küñelemne biläp ala,”-di.

Rus tele uqıtuçısı Veronika Şkirko isä törek serialların sıynıftaşları kiñäşe belän qarıy başlağan. Ul şunnan soñ törek mädäniyäte belän qızıqsına başlıy. “Qayber ğoref-ğadätlärne seriallardan öyrändem. Mäsälän, öydän kitüçeneñ artınnan su sibälär. Monıñ niqadär mäğ’näle buluın axırdan beldem,”-di Veronika.

Anıñ äytüençä, seriallar Törkiyäne barıp kürergä êtärgeç birä. Ul İstanbulnıñ cixerläwçe manzaralarına xäyran qaluın belderä.

Veronika töreklärneñ mädäniyät häm ğoref-ğadätlären saqlawçı millät buluın uylıy. “Alar seriallar häm fil’mnar aşa mädäni qıymmätlären kiläse buınnarğa citkerä,”-di ul.

Êşmäkär xanım Alimä Mamutova törek seriallarınıñ êmośional’ yağın alğa quy. “Alarnı qarağanda bik küp küz yäşe tügelä, romantik mizgellär bula. Rus seriallarında monı bik kürep bulmıy. Şuña kürä Rusiyä xatın-qızları törek serialların yaratıp qarıy,”-di ul.

Alimä fil’mda uynawçılardan täêsirlänüen dä äytä. “Alarnıñ ayırım ber xarizması bar. Artistlar matur, êstetik, cılı häm çın xislären êkrannar aşa citkerä ala,”-di ul.

Kamila Otarova isä rus seriallarında uynağan student qız. Ul üzeneñ Rusiyädä dä, Törkiyädä dä fil’m töşerüdä qatnaşuın äytä. “Töşerü prośessları ber-bersennän ayırıla. Rusiyädä seriallar bik tiz töşerelä. Törkiyädä ul ozaq däwam itä. Ämma moxit cılı häm küñel kütärüçe bula,”-di yäş’ aktrisa. Ul Törkiyädä fil’m töşergändä aç qalu mömkin bulmawın assızıqlıy. “Kimendä 3 tapqır aşatalar. Bu uynawçılarğa uñay täêsir itä. Rusiyädä mondıy närsä kürü mömkin tügel,”-dide Kamila Otarova.