"Xalqıbız TRT xäbärlärenä ışana"

“Xalqıbız TRT xäzerlägän xäbärlärneñ barısına da ışana”, -dide Törkiyä teleradiokompaniyäse ğomum mödire İbrahim Ärän. Ul Aziyä-Tın okean teleradiotapşırular berlegeneñ iñ ähämiyätle çaralarınnan berse bulğan häm TRTnıñ ximayäsendä oyıştırılğan 5nçe Dön’yaküläm xäbär forumında qatnaştı. Çara 35 ildän 120dän artıq qunaq belän tormışqa aşırıla.

Ärän üzeneñ berläşmädä räis urınbasarı da buluın belderde. Cıyılışnıñ bıyılğı teması - “Xäbärçelektä ışanıç häm çınbarlıq”. İbrahim Ärän bu nisbättän bolay dide: “Däwlät teleradiokompaniyäse häm töp massaküläm mäğ’lümat çarası bularaq äytäm, ışanıç-bügen iñ zur problemalarınnan berse. Çönki xalıqnıñ kul astında millionnarça xäbär çığanağı bar, här kön sośial’ media aşa 100lärçä xäbär kürälär. Xalıqara mäydanda “feyk n’yus” dip ataluçı uylap çığarılğan, yalğan xäbärlär bik küp kön üzägenä kilde, äyläneşkä kerde. Bu da, asılında, bezneñ şikelle däwlät kanalları häm töp massaküläm mäğ’lümat çaralarınıñ cawaplılığın tağın da arttıra”.

Ärän “TRT Xäbär” kanalınıñ 1 yıldan artıq qaralu däräcäse buyınça iñ yuğarı noqtada urın aluın äytte.  “Xalqıbız TRT söylägän xäbärlärneñ barısına ışana. TRT bularaq maqsatıbız, çınnan da, tamaşaçılarıbızğa härwaqıt döres xäbärne citkerü, anıñ döreslegen tikşerep toru häm xäbärneñ êçendä yalğış mäğ’lümat kitmäwenä iğ’tibar itü. Köndä yözlärçä, atnada meñnärçä yaña xäbär biräbez. Bu xäbärlärneñ barısın kontrol’ itü çınlıqta da bik awır,”- dide ul.

Ärän tamaşaçılarnıñ xäbärlärne bik tiz êşkärtüen telgä aldı. “Här xäbär tiz arada iskerä, yañasın belergä, kürergä telilär. Bu da bezgä şaqtıy awırlıq kiterä”.

TRT ğomum mödire İbrahim Ärän çığışında şularğa iğ’tibarnı cälep itte: “Sonğı waqıyğalarda kürdek ki - xäbärçe bulu, ışanıçlı xäbär çığanağı bulu bik ähämiyätle. Tamaşaçılarnıñ yañadan xäbär çığanaqların saylawı häm bolarnıñ arasınnan ışanıçlı bulğannarın bilgeläp, alardan kilgän mäğ’lümatlarnıñ tikşerelgän buluına inanğannan soñ qabul itüe kiräk dip sanıym”.