Täwge xatirälär fantaziyä bulırğa mömkin

Ğalimnär 40% keşeneñ isendä qalğan täwge xatiräläreneñ uylap çığarılğan bulu mömkinlegen açıqladı.   

Angliyanıñ Bredford häm Nottingem Trent universitetı belgeçläre söylägänçä,  tikşerenüdä qatnaşqan 6 meñ 641 keşeneñ 38,6 %ı 2 yäş’täge waqıtın häm annan êlekkegelärne xäterläwen äytkän. Älege êşçänlekneñ näticäläre "Psychological Science" jurnalında basıldı. Anda yazılğança, qatnaşuçılarnıñ 893e ber yäş’täge häm annan da keçkenä waqıtların xäterli. Bu xäl, ayıruça, urta yäş’lelär häm ölkännär arasında kiñ taralğan.

Belgeçlär qatnaşuçılarnıñ isendä qalğan täwge xatirälären häm ul waqıttağı yäş’lären soradı. Bu mizgelne waqlıqları belän xäterläwläre, anıñ süzle yäisä küreneşle ber çığanaqqa nigezlänüe kiräklege äytelde. Tikşerenüçelär iñ êlekkege xäter bilgeläreneñ êçtälegen, telen, tabiğaten häm taswirlawçı waqlıqların centekläp öyrände.

Näticädä keşelärneñ 2 yäş’kä qadär bulğan xatiräläreneñ säbäplären açıqladılar. İstä qalğan dip sanaluçı bu mizgellärneñ kübese keçkenä waqıtta uq kiçergän ğailä mönäsäbätläre, qayğıru, borçılu şikelle toyğılar, fotoräsemnär häm öy êçendäge söyläşülärdän alınğan. Ğalimnär fikerençä, keşelärneñ kübeseneñ täwge xatiräläre 3 yäşennän başlana.