Kreml’dä mäxäbbät añlatu

Rusiyä däwlät başlığı Vladimir Putin Dön’ya Çempionatı ütkärü wäqalätlären Katar ämire Şäyex Tämim bin Xamad äl Sanigä tapşırdı. Futbol söyüçelärneñ küzläre 2022nçe yılda Katarda bulaçaq.

Tapşıru tantanası Kreml’dä uzdı. Anda Putin Çempionatnı ütkärü simvolı bulğan futbol tubın Xalıqara futbol federaśiyläre berlege räise Djanni İnfantinoğa birde. Ul, üz çiratında, tupnı Katar ämire äl Sanigä tapşırdı.

Rusiyä liderı Putin ileneñ 2018nçe yılğı Dön’ya Çempionatın uñışlı uzdıruı belän ğorurlanuın belderde. Ul oyıştıru täcribälären Katar belän urtaqlaşırğa äzer buluların äytte. Şulay uq, ilbaşı bıyıl çirek finalğa çığa alğan Rusiyä komandasınnan 2022nçe yılda tağın da zurraq uñışlar kötüen dä äytergä onıtmadı.   

Infantino isä tantanada Dön’ya Çempionatı waqıtında Rusiyägä här keşeneñ ğaşıyq buluın belderde häm rusçalatıp: “Min Rusiyäne yaratam,” (Ya Lyublyu Rossiyu) dide.

FİFA başlığı, monnan êlegräk, Rusiyädäge yarışlarnı “moña qadär oyıştırılğan iñ yaxşı Dön’ya Çempionatı” dip bäyälägän ide. Tantanada ul: “4 yıldan soñ Katarğa da ğaşıyq bulaçağımnan şiklänmim,”-dip östäde.