Mäğarädän qotqarılğan balalar xaqında fil’m

Tailandnıñ tön’yağındağı Çiang Ray töbägendä 12 futbolçı bala häm trenerlarınıñ mäğarädä biklänep qaluları xaqında näfis fil’m töşereläçäk. Bu xaqta BBC qanalı söyläde. Atnalarça mäğarädän çığa almıyça tilmergän 12 bala häm trenerlarınıñ xikäyäse belän Amerikanıñ Pure Flix Entertainment fil’m şirkäte qızıqsına. Alarnıñ Tailandtağı urtağı Maykl Skott waqıyğanıñ bik täêsirle buluın häm sśenariy yazu başlanacağın söyläde. Fil’m şirkäte qotqaru êşlären yaqınnan küzätkän häm prośessta qatnaşqan här keşene tıñlağan. Bu mäğ’lümatlar kartinada da qullanılaçaq. Monnan tış, mäğaräneñ muzey xälenä kiterelep, zıyarätçelär öçen açılacağı da äytelde.   

 Balalarnı qotqaru operaśiyäläre barışında qorbannar da buldı. Tailandnıñ êlekkege professional’ akvalangistı Saman Gunan, kislorodı betep, mäğarä êçendä ülde. Balalar yanına kerep, alarnıñ sälamätleklären tikşerep torğan häm mäğarädän iñ axırğı bulıp çıqqan avstraliyäle tabib Riçard Xarris ätise ülgändä yanına qayta almadı.

11 häm 16 yäş’lär arasındağı 12 bala häm 25 yäş’lek trenerları 23nçe iyün’dä Txam Luang mäğaräsenä kergännän soñ köçle yañğırlar çığu yulın su belän qapladı. Yuğalğan törkemne 9 kön êzlädelär. Bu êşkä Angliyä, Avstraliya, Bel’giyä, Daniya, Kanada, Qıtay häm Finlyandiyäneñ iñ täcribäle dayverları, Tailandnıñ diñgezdäge maxsus quätläre quşıldı. Futbol komandası tabılğannan soñ da tiz genä çığara almadılar. Mäğarä tunnel’läre su belän tulğan. Anıñ aşa ütü xälsezläşkän balalar öçen xätär. 5 kön kötkännän soñ çığaru operaśiyäse başlandı häm ul 3 köndä tögällände.