“Qıçqıruçı mumiya”nıñ kemlege açıqlandı

Misırda 1886nçı yılda Nil yılğasınıñ könbatışında tabılğan “Qıçqıruçı mumiya” iseme birelgän tabıldıqnıñ kemlege turında yaña mäğ’lümatlar bar. DNK analizı mumiyanıñ Misır firğawene 3nçe Ramzesnıñ ulı buluın kürsätkän. Ğalimnär anı prinś Pentaver dip uylıy. Ul änise patşabikä Tiye belän berlektä 3nçe Ramzesnı üterergä mataşqan. Tiye - firğawenneñ ikençe xatını. Täxetkä berençe xatınınnan tuğan ulı utırırğa tiyeş bula. Tiye isä üz ulın utırtırğa teli.

     Başqa dinastiya äğ’zalarınıñ mumiyaları aq citen tuqımağa sarılğan, ä “Qıçqıruçı mumiya”nıñ sarıq tirese eçenä quyıluna ğalimnär “çista tügel”  mäğ’näse birgän ide.  Östäwenä bu mumiyanı östän-östän genä bal’zamlağannar. Êlegräk ul ağulanıp üterelgän dip baralar ide, xäzer muyın tiräsendäge êzlär asılğan buluına işarätli.

3nçe Ramzesnı ütergän patşabikä Tiye, ulı Pentaver häm bu üterüdä qatnaşqan başqa keşelär asıla. Bu detal’lärneñ bötenese mumiyanıñ prinś Pentaver bulu fikeren köçäytä.

  3nçe Ramzes Misırda bezneñ êrağa qadär 1186-1155 yıllarda idarä itkän. Firğawenneñ mumiyasın centekle tikşerülär anıñ buğazınıñ kiselüen kürsätä.  Aña ber ük waqıtta berniçä pıçaq belän höcüm itkännär.