Бaшикa бaзaсы / Başika bazası

Ğıyraqta ber ük waqıtta Amerika Quşma Ştatlarınıñ Ärbildäge xärbi bazası belän Törkiyäneñ Musuldağı Başika bazasına höcümnärneñ yasaluı iğ’tibarnıñ qabat şuşı töbäkkä yünälüenä säbäp buldı.

Törkiyäneñ Musulnıñ 25 çaqrım tön’yağında ğına urnaşqan zur xärbi baza ni öçen tämek itep alındı, artında kem bar, bolar bik möhim. Bigräk tä soñğı waqıtta Sincar belän ber rättän bu töbäktä Törkiyäneñ terrorçılıq belän köräşe artıp däwam itkän çaqta.

Törkiyäneñ Ğıyraqnıñ tön’yağında êre häm waq küp sanda xärbi bazası häm keçkenä xärbi nığıtma töbäkläre bulsa da Başika – zurlığı yağınnan bulmasın, xärbi caylanmaları cähätennän bulmasın barısınnan da ayırılıp alğı planğa çığa. Şulay uq bu baza barı tik “PKK” terror oyışması belän köräş cähätennän genä kritik rol’gä iyä tügel, ber ük waqıtta Musulda “DEAŞ” terror oyışmasınnan çistartıluğa häm töbäktä buluı zarur totrıqlılıqqa häm tigezlekkä dä xezmät itä.

Baza “Haşdi Watani” köçlärenä dä ozaq waqıt buyı işeklären açtı häm törek xärbiläre bu köçlärne “DEAŞ”qa qarşı öyrätte.

Älbättä, bu wazğıyät’ töbäktä mäzhäbçe säyäsät alıp baruçı qayber törkemnärne, bigräk tä “Haşdi Şaabi” êçendä êşçänlek alıp baruçı radikal’ törkemnärne bik tınıçsız itä ide. Ayıruça Baş ministr Maliki çorında İranğa yaqın törkemnärneñ basımı belän Törkiyäneñ bazadan kitüe öçen basımnar häm yanawlar başlanğan ide, lakin Törkiyä, bu totışlarğa iğ’tibar itmiçä, Bağdat citäkçeläre belän problemanı uñay räweştä xäl itü öçen söyläşülär alıp barğan ide.

Xäzer Başıka xärbi nığıtmasınıñ raketalar höcümenä duçar buluı yañadan “Haşdi Şaabi” êlementların iskä töşerde. Bigräk tä soñğı waqıtta Törkiyäneñ Sincar töbägendä “PKK” terror oyışmasınnan çistartıluı maqsatınnan çığıp xärbi xäräkät ütkäräçägenä qağılışlı bilgelär päydä bulğan çorda. “Haşdi Şaabi”gä bäyle köçlärneñ Sincarda här uzğan kön tağın da kübräk urnaşuın häm Ärbil-Bağdat kileşüenä qarşı biredä “PKK”nıñ cirle êlementları belän xezmättäşlek urnaştıruın da uylasaq, İranğa yaqın törkemnärneñ äyterseñ Törkiyägä qarşı ber xäräkät ıslubı êçendä buluın kürä alabız. Axır çiktä, İran öçen Sincar strategik ähämiyätkä iyä, bu töbäkne Süriyägä ireşelüe cähätennän logistik küçär bularaq kürä häm yuğaltırğa telämi, lakin şuşı poziśiyasın “PKK” belän xezmättäşlek yulı belän köçäytü tırışlığı bik, ämma bik zur xata.

Axır çiktä Törkiyä Ğıyraq häm Süriyä küçärendä “PKK” terror oyışmasınıñ mäydan xakimiyäten urnaştırğan böten töbäklärne çistartuda qatğıy häm monıñ zarur bulğanın başqarudan da tartınmıy, İranğa yaqın törkemnärneñ Süriyädä dä, bigräk tä Afrin töbägendä oxşaş kereşüläre bulğan häm naçar tämamlanğan ide.

Törek ğaskäre küp sanda şiğıy suğışçısın “PKK”lılar belän bergä täêsirsez xälgä kitergän ide. Xäzer İranğa yaqın törkemnär Törkiyäne Ğıyraqnıñ tön’yağında sınap qarıy, monıñ näticäseneñ dä bu törkemnärneñ yazmışı cähätennän yaxşı bulmayacağın farazlıy alabız.

Can Acun

SETA säyäsät, iq’tisad häm cämğiyät tikşerenüläre waqıfınıň tışqı säyäsät tikşerenüçese