Ukraina tovarları Pol'şa aşa uzmayaçaq

Pol’şa awıl xucalığı ministrlığı häm protestçı fermerlar arasındağı söyläşülärdä Ukraina awıl xucalığı tovarlarınıñ Pol’şa aşa uzuın tıyu turında qarar çığarıldı.  

Ministr urınbasarı Mixal Kolodjeyçak matbuğatqa beldergänçä, älege qarar Pol’şa häm Ukraina arasında säwdä qağıydälären tärtipkä salğançı ğamäldä bulaçaq. Ul 1nçe aprel’dä qullanılışqa kerä.

Bilgele bulğança, Ukraina belän Awrupa Berlege arasında 2022nçe yılda tamğaxanäsez säwdä rejimı kertelde. Bu Ukrainanıñ awıl xucalığı êksportınıñ ähämiyätle öleşeneñ Awrupa illärenä cibärelüenä kiterde. Näticädä älege êşlänmälär çik buyı däwlätlärendä cıyıldı. Bu xäl cirle citeşterüçelär arasında qanäğat’sezlek tudırdı. Monnan bigräk tä Pol’şa, Slovakiya, Vengriya, Rumıniya häm Bolgariya şikelle illärneñ awıl xucalığı tarmağı zıyan kürde.  

Säwdä çikläwläre mäs’äläse Ukraina belän Pol’şa arasında 28nçe martta Varşavada uzaçaq söyläşülärneñ töp teması bulaçaq.