Tovar imitaśiyäläwçelär iqtisadqa zur zarar sala

Awrupa Berlegendäge kiyem, kosmetika häm uyınçıq citeşterüçelär tovarların imitaśiyäläwçelär arqasında yılına yaqınça 16 milliard yevro yuğalta.

İspaniyäneñ kön’yağındağı Alikante şähärendä urnaşqan Awrupa Berlege intellektual’ milek agentlığınıñ sişämbe könne çıqqan ber tikşerenüenä qarağanda, mondıy yalğan tovar äyläneşe näticäsendä yaqınça 200 meñ keşe êşen yuğaltkan. Şularnıñ 40 meñe Germaniyädä.

İntellektual’ milek agentlığınıñ başqarma mödire Joao Negrao bolay di: “İmitaśiyä tovarların qullanuçılar markalarğa häm iq’tisadqa qıymmätkä töşä. Bu axırğı tikşerenü satular häm êş urınnarı yağınnan çınnan da zur yuğaltular barlığın kürsätä”.

Germaniya uyınçıq industriyäse Awrupa Berlegendä iñ nıq zarar kürgän tarmaqlardan berse häm yalğan tovarlar säbäple yıllıq satu yuğaltularınıñ öçtän bersen (334 million yevro) täşkil itä.

Mäğ’lümatlarğa qarağanda, bu wäzğıyät’ yoğıntısında qalğan ikençe tarmaq - kiyem-salım industriyäse. Anda här yıl yaqınça 12 milliard yevro kerem yuğala häm bu tulayım tovar äyläneşeneñ 5,2%ına turı kilä.