Gazprom gaz cibärüne kimetä

Rusiyä ênergetika şirkäte Gazpromnıñ texnik säbäplär arqasında Tön’yaq Ağım ütkärgeçe aşa tabiğıy gaz qudıruı 40%qa kimiyäçäk. Bu xaqtağı belderüdä qayber gaz kompressorlarınıñ Germaniyäneñ “Siemens” firmasına qarap tözätü öçen cibärelüe häm älegä kire qaytmawı äytelä. Şul säbäple, barı 3 gaz kompressorı qullanıla ala.   

Belderüdä bolay diyelä: “Tön’yaq Ağım ütkärgeçenä gaz cibärü, planlaştırılğan köndälek 167 million kubometr urınına, xäzerge waqıtta 100 million kubometr ğına bula ala”.

Tön’yaq Ağım - Yamal-Awrupa ütkärgeçe häm Ukrainadağı gazütkärgeçlärdän tış, Rusiyä gazın Awrupağa iltüçe ähämiyätle yullardan berse bularaq bilgele.

Şirkät monnan alda yasağan belderüendä Yamal-Awrupa ütkärgeçe aşa gaz qudırunı tuqtatuların, Ukraina aşa cibärüneñ dä yartılaş kimüen citkergän ide.