Germaniyä häm Franśiyä rubl' belän tüläwdän baş tarttı

Germaniyä häm Franśiyä Rusiyäneñ tabiğıy gaz öçen rus aqça berämlege rubl’ belän tüläw taläben kire qaqtı. Monı alar kileşüne bozu dip atadı.

Germaniyä iq’tisad häm klimatnı saqlaw ministrı Robert Xabek häm älege ilgä säfär qıluçı Franśiyä iq’tisad ministrı Bryuno Le Mêr başqala Berlindağı oçraşularınnan soñ urtaq matbuğat cıyılışı ütkärde.

Xabek äytüençä, Germaniyä Rusiyä tabiğıy gazınıñ Awrupağa ağımı kiselüen dä kertep barlıq sśenariylarğa äzer. Ul Vladimir Putinnıñ zäñgär yağulıq öçen tüläwlärne rubl’ belän alu şantajın qabul itmäyäçäklären belderde.

Xabek Franśiyä belän Germaniyäneñ köndälek koordinaśiyä alıp baraçağın, Rusiyäneñ Awrupanı bülü tırışlıqlarınıñ uñışsız bulaçağın assızıqladı. Ul Könbatış däwlätläreneñ Rusiyägä qarşı sankśiyälärdäge buşlıqlarnı yabu kiräklegen dä östäde.

Franśiyä iq’tisad ministrı Bryuno Le Mêr dä Awrupağa Rusiyädän gaz ağımınıñ tuqtatıluına äzerlänülären, Mäskäw taläben kire qağuların söyläde. Ul Rusiyä belän kileşülärneñ yevro nigezendä tözelüen häm şulay uq qalaçağın belderde.

İsegezgä töşeräbez, Rusiyä liderı Vladimir Putin dus bulmağan däwlätlärgä tabiğıy gaz satqanda tüläwne rubl’lär belän alu turında qarar imzaladı. “Rubl’ belän tülänmäsä, gaz kileşüläre tuqtatılaçaq,”-dide ul.