Visa häm Mastercard Rusiyädäge operaśiyälären tuqtattı

AQŞ üzäkle finans xezmät şirkätläre Visa häm Mastercard Rusiyädäge operaśiyälären tuqtatıp tora.

Visadan yasalğan belderügä qarağanda, şirkät kiläse könnärdä barlıq êşçänlegen tuqtatu öçen Rusiyädäge kliyentları häm xezmättäşläre belän bergä êşläyäçäk.

Rusiyädän birelgän Visa kartaları belän başlanğan barlıq êşçänleklär monnan soñ il tışında êşlämäyäçäk, şul uq waqıtta Rusiyä tışındağı finans oyışmaları birgän kartalar belän Rusiyädä berni êşläw mömkin bulmayaçaq.

“Visa”nıñ yuğarı idaräçese Al Kelli Rusiyäneñ Ukrainanı ber säbäpsez basıp aluı häm dön’ya cämäğat’çelege şahit bulğan qabul itelmäs waqıyğalardan soñ xäräkätkä küçärgä mäcbür qaluların belderde.

“Mastercard”tan yasalğan belderüdä Ukrainadağı bäreleşlärneñ moñarçı kürelmägän öslege häm bilgesez iq’tisadi wäzğıyät’ne isäpkä alıp Rusiyädäge xezmätlärne tuqtatıp toruğa qarar birüläre äytelä.

“Rusiyä bankları tarafınnan birelgän kartalarğa monnan soñ Mastercard çeltäre xezmät kürsätmäyäçäk. İl tışında birelgän teläsä-qaysı Mastercard Rusiyä ob’yektlarında häm bankomatlarında êşlämäyäçäk” diyelä belderüdä.

Şul uq waqıtta, İzrail Rusiyä däwlät başlığı Vladimir Putinğa yaqın buluı bilgele 25 rus milliarderına çikle külämdä sankśiyä qararı çığardı. Älege oligarxlarnıñ şäxsi oçqıçları İzrail aêroportlarında 48 säğat’tän artıq qala almayaçaq häm alarnıñ yaxtalarınıñ portlarda tuqtatıluına yul quyılmayaçaq.

İtaliyä dä 5 Rusiyä milliarderınıñ üzendäge mal-mölkäten konfiskaśiyäläde.