Nissannıñ êlekkege idaräçese Livanğa qaçtı
Ul Yaponiyädä finans xärämläşülärdä ğayeplänä
Yaponiyä avtomobil’ şirkäte Reno-Nissan-Miśubisi Al’yansnıñ êlekkege idarä räise Karlos Gon Livanğa qaçtı. Ul Yaponiyädä öy sağı astında ide. Gonnı finans maxinaśiyälär häm wazıyfasınnan naçar niyät belän faydalanuda ğayeplilär. Ul üzeneñ keremen kimetep kürsätkän häm şäxsi investiśiyäläreneñ zararın şirkät xisabınnan tülägän. Anı 2018nçe yılda wazıyfasınnan alalar. Şul yılnıñ 19nçı noyabrennän birle ul saq astında bula.
Êşmäkär üzeneñ belderüendä xökemnän qaçmawın, ä ğadelsezlek häm säyäsi êzärlekläwdän qotılırğa tırışuın äytä. Ul Yaponiyäneñ yustiśiyä sistemasın keşe xoquqların bozuda ğayepli häm anıñ äsire bulırğa cıyınmawın citkerä.
Gonnıñ niçek itep Yaponiyädän qaçuı bilgesez. Aña çikne uzu tıyılğan. Livan dairäläre êşmäkärneñ başqa isem astında ilgä kergän buluın farazlıy. Cirle media Gonnıñ Beyrutta xatınınıñ tuğannarı öyendä buluın yaza.
65 yäş’lek Gon Braziliyädä tua, anıñ äti-änise livanlı. Ul Beyrutta üsä, annarı belem alu öçen Franśiyägä kitä. Karlos Gon 3 il - Franśiyä, Braziliyä häm Livan watandaşı.
