Germaniyä, Angliyä häm Franśiyä “İnsteks” tözede

Germaniyä, Franśiyä häm Angliyä İran belän säwdä itü maqsatınnan urtaq “İnsteks” isemendäge tüläw mexanizmı tözede. Monı älege illärneñ tışqı êşlär ministrları Buxarestta ütüce cıyılışta xäbär itte.

Franśiyä tışqı êşlär ministrı Jan-İv Le Drian beldergänçä, sälamätlek saqlaw häm azıq-tölek tarmağında İran belän säwdä itärgä teläwçe Awrupa şirkätläre älege mexanizm yärdämendä monı qanunlı räweştä êşli alır. Ul bu adımnıñ İran öçen ähämiyätle işarät buluın häm atom-töş kileşüenä bäyle buluların kürsätüen äytte.  

“İran atom-töş kileşüenä tuğ’rı qalğanda bu däwlät belän säwdä häm finans êşçänleklären däwam itäçäkbez,”-dide ul.

Le Drian yasalğan adımnarı belän Awrupanıñ mänfäğat’lären dä saqlawların belderde häm başqa illärne dä älege mexanizmğa teläktäşlek kürsätergä çaqırdı. Anın äytüençä, mexanizm tulısınça ğamälgä kersen öçen qayber êşçänleklär kiräk.

Angliyä tışqı êşlär ministrı Djeremi Xant ta İrannıñ atom-töş kileşüe qısalarında möhim adım yasaluına basım yasadı. Ul yaña mexanizm belän älege il xalqınıñ ixtiyacı bulğan tovarlar belän säwdä qabat torğızılaçağın söyläde. Bu azıq-tölek, mediśina kiräk-yaraqları häm darular.

“Şul uq waqıtta bu bäylelek bezne İrannın doşmança häm totrıqlılıqnı bozuçı ğamällärenä qarşı çığudan tuqtatmas,”-dide ul.   

Germaniyä tışqı êşlär ministrı Xeyko Maas isä, “İnsteks”nıñ ähämiyäten assızıqlap: “Bu mexanizm xäräkät itü mömkinlegenä iyä buluıbıznı kürsätä. Atom-töş kileşüenä ışanuıbıznı kürsätä. Çönki monıñ Awrupanıñ iminlek mänfäğat’lärenä turıdan-turı täêsir itüen uylıybız,”-dide. Ul İrannın xärbi uran bayıtuın telämäwlären dä östade.

“Bez öleş kertkän bülem İran belän iq’tisadi xezmättäşlekne däwam itü öçen mömkinlek tudıru häm tüläw kanalı buldıru ide,”-dide ministr.