Yaponiyä çit ildän êşçelär alaçaq

Yaponiyä, üz xalqınıñ qartayuı häm yäş’lärneñ êşçe köçe ixtıyacına cawap birmäwe säbäple, kiläse yıllarda ilgä 100 meñnärçä çit il xezmät köçe alırğa planlaştıra.

Monıñ qısalarında, aprel’ ayında yaña viza sisteması ğamälgä keräçäk. Anda çit ildän kilüçe eşçe köçe öçen qulaylıqlar küzdä totıla.

Yaponiyä xökümäte, monnan tış, üzlärendäge çit il êşçeläreneñ xälen yaxşırtu öçen dä adımnar yasayaçaq. Alarnıñ xezmät şartları ğına tügel, köndälek tormışların da caylaştıru öçen çaralar küreläçäk.

Yaponiyä xökümäte yöz meñnärçä çit il êşçese öçen şartlar tudırmaw säbäple tänqıyt’länä ide. Alarnıñ stajyer programması qısalarında êşlätep êkspluataśiyälänüe äytelä. Xoquqçılar birgän mäğ’lümatlarğa qarağanda, yapon firmaları çit il keşelären oçsız êş köçe bularaq qullana häm ictimağıy tormıştan izolyaśiyälängän räweştä yäşätä.

Monnan tış, älege êşçelärne kiterüçe aradaşçılarnıñ üz yärdämnäre öçen zur külämdä tüläw alıp keşelärne burıçqa batıruları da tänqıyt’länä. Yaponiyä xökümäte êşçe alınuçı illärdäge däwlät oyışmaları belän xezmättäşlek itep bu wäzğıyät’ne dä tözätergä niyätli.