“Çüldäge Davos” bıyıl niçek ütä?

Sogud Ğaräbstanı başqala Riyadta uzuçı xalıqara “Kiläçäkkä kertem kereşüe konferenśiyäse”neñ täwge könendä 50 milliard dollarlıq kileşülär tözelüen belderde. Cirle xäbär agentlığında yazılğança, berençe könne Franśiyä, Qıtay, AQŞ, Yaponiyä, Berläşkän Ğaräp Ämirlekläre, Angliyä, Kön’yaq Koreya häm Hindstannıñ şirkätläre belän ênergetika häm infrastruktura tarmaqlarında xezmättäşlek turında dokument imzalanğan.

Soğud Ğaräbstanınıñ neft’ şirkäte Saudi Aramko 34 milliard dollarlıq 15 memorandum tözede. Bu kileşülär industriyäneñ milliläşüe häm tağın da kübräk êş mömkinlege tudıru maqsatın küz uñında tota.

Transport ministrı Näbil äl-Amudi “Xarameyn tizyöreşle poyızd” proyektınıñ ikençe êtabı öçen Soğud Ğaräbstanı - İspaniyä urtaq şirkäte Al - Şoula grup belän 3 milliard 600 million dollarlıq kileşü imzaladı.  Timer yulların ber-bersenä bäyläwçe küper tözü öçen 10 milliard dollarlıq dokumentqa isä Qıtay belän bergä qul quydılar.

AQŞ belän yök vagonnarı yasawda kileştelär. Proyektnıñ bäyäse - 297 million dollar.

Täxet varisı prinś Möxämmät bin Sälman uzğan yıl başlağan “Çüldäge Davos” cıyılışları bıyıl jurnalist Cämal Qaşıqçı cinayätennän son bulğan kiñ külämle boykot qararları külägäsendä ütä. Êlegräk konferenśiyädä qatnaşaçaqların beldergän 40qa yaqın isem älege qanlı waqıyğadan soñ kire uyladı.