Tesla Törkiyädä berençe êş iğ’lanın çığardı

Êlektrlı avtomobil’ häm anıñ motor öleşlären uylap çığaruçı, yasawçı häm satuçı Amerika şirkäte Tesla Motors Törkiyä bazarına kerä. Berençe adım bularaq oyışma êş iğ’lanı bastırdı.

Teslanı tözüçe häm yuğarı idaräçese Êlon Mask bu xaqta Twitterdan da belderü yasadı. “Bu yıl däwamında Teslanı Törkiyädä bazarğa çığarırğa planlaştırabız. İlegezne yaratam häm täq’dim itüdä üzem anda bulaçaqmın,”-dip yazdı ul.

Tesla iğ’lanında belem däräcäse yäisä bu tarmaqta hönäri täcribäse buluçılarnı êş öçen kötep qaluların belderälär. Alınaçaq xezmät kürsätü menedjırınıñ burıçları “kliyentlarğa kimçeleksez räweştä xezmät kürsätü, törkem äğ’zaların öyrätü, köndälek operaśiyälär belän  idarä itü häm Tesla xezmäten Model 3 kliyentlarınıñ ixtıyaclarına cawap birerlek xälgä kiterü” bularaq sanalıp ütä.