Norvegiya Netan’yaxunı qulğa alaçağın belderde

Xalıqara mäxkämä İzrail xökümäte räise Bin’yamin Netan’yaxu häm saqlanu ministrı Yoav Gallantnı qulğa alu qararı çığarsa, Norvegiyä monı ğamälgä aşıraçağın belderde. İlneñ tışqı êşlär ministrı Êspen Bart Êyde bu xaqta matbuğatqa interv’yusında äytte.

Ministr söylägänçä, mäxkämä qulğa alu qararı çığarğannan soñ Netan’yaxu häm Gallant Norvegiyä territoriyäsenä ayaq bassa, alarnı totqarlayaçaqlar. Ul şul uq prośeduranıñ Fälästin qarşılıq xäräkäte “Xamas” liderına da qağılaçağın citkerde.  

Norvegiyä Netan’yaxunı qulğa alaçağın beldergän berençe Awrupa däwläte buldı.

Xalıqara mäxkämäneñ baş prokurorı Kärim Xan 20nçe mayda Netan’yaxu häm Gallantnı qulğa alu qararı çığaru öçen möräcäğat’ itüen belderde. Şundıy uq möräcäğat’ “Xamas”nıñ säyäsi byurosı räise İsmail Xäniyyä, xäräkätneñ Ğazzädäge liderı Yax’ya Sinvar häm “İzzäddin äl-Kassam” brigadalarınıñ liderı Möxämmät äd-Dayf öçen dä yasaldı.