İndoneziyadağı afätneñ qorbannarı arta

İndoneziyäneñ Könbatış Sumatra töbägendä Merapi yanartawı şartlawı waqıtında cıyılğan taş, köl häm tufraq öyemnäreneñ musson yañğırları arqasında şuışuı säbäple häm barlıqqa kilgän su basularda ğomere özelüçelärneñ sanı 58gä citte. 33 keşe isä xastaxanädä.

Ğadättän tış xällär ağentlığı süzçese Abdul Muxari taşqınnarda yözlärçä öyneñ su astında qaluın häm 1500 ğailäneñ êvakuaśiyälänüen belderde.

Yuğalğan 35 keşene tabu öçen naçar hawa şartları arqasında tuqtap qalğan êzläw-qotqaru êşläre qabat başlanğan.

Hälakätkä duçar bulğan cirleklärgä küçmä kuxnya häm su çistartu qorılmaları quyıla.

İndoneziyada Sumatra utrawınıñ könbatışında urın alğan Merapi yanartawı täwge tapqır 3nçe dekabr’dä şartlağan ide. Şunnan soñ ul yözlärçä tapqır attı häm cirlektä yäşäwçelärgä yanartawğa 4,5 çaqrımnan da yaqınlaşmasqa kürsätmä birelde.