Bayden Netan'yaxunı kisätte

Amerika Quşma Ştatları ilbaşı Djo Bayden İzrail xökümäte räise Bin’yamin Netan’yaxunı İran höcümnärenä cawap birgänçe nıqlap uylarğa çaqırdı. İke räsmi zatnıñ telefonnan söyläşüe turında jurnalistlarğa amerikalı wäqalätle citkerde. Ul Baydennıñ älege äñgämädä Netan’yaxuğa kiyerenkelekneñ artuı qurqınıçın iğ’tibar belän uylarğa häm mäs’älägä strategik küzlektän qararğa kiräklegen söyläwen äytte.

Wäqalätle İzrailneñ İran belän kiyerenkelekne arttırırğa uylamawın açıq räweştä belderüen, AQŞnıñ İzrailneñ bulırğa mömkin cawap höcümenä yärdäm itü planı yuqlığın da citkerde.

İsegezgä töşeräbez, İzrail İrannıñ Süriyädäge konsullıq binasına 1nçe aprel’dä hawa höcüme yasadı. Anda 7 keşe ülde, 2se general. İran älege ğamälneñ üz territoriyäsenä höcüm belän berdäy buluın häm monı bolay ğına qaldırmayaçaqların belderde. İzrail dä İrannıñ höcümenä cawap biräçägen äytte.

İran 13nçe aprel’dä İzrailgä yözlärçä kamikadze keşesez hawa apparatı, ballistik häm qanatlı raketa cibärde. İzrail alarnıñ kübeseneñ hawa saqlanu sistemaları belän yuq itelüen, tik kön’yaqtağı ber xärbi bazağa raketa töşüen belderde.