Baş miyenä çip urnaştırılğan keşeneñ uyların uqıp bula

Amerika Quşma Ştatlarında baş miyenä çip urnaştırılğan keşeneñ uyların 25 minut buyı uqıdılar.

“Wall Street Journal”da çıqqan xäbärgä qarağanda, Parkinson belän awıruçı 71 yäş’lek Djeffri Kifernıñ baş miyenä üz rizalığı belän çip tağalar. İmplantattağı çiplar baş miyenä cibärelüçe signallarnı cıyıp bara häm alar kabel’sez êlemtä aşa yasalma aqıl yärdämendäge programmağa cibärelä. İmplantatnıñ ber çıbığı isä Kifernıñ kükrägendäge batareya häm antenna funkśiyäse başqaruçı cihazğa berketelä.

Êşçänlek barışında awırunıñ qulları belän yasağan qayber xäräkätläre monitorlarda ülçängän baş miye signalları belän turı kiterelde.  Soñınnan Kiferdan qulların qıbırdatmıyça monnan aldağı xäräkätlären yasaw turında uylawın soradılar. Ul uylağanda baş miye signalları şunda uq terkälä häm xäräkätlär belän berläşä. Älege proyektnıñ avtorlarınnan berse Benjamin Rapoport: “Näq’ şunı tabarğa telädek. Xäräkätkä äwerelä almağan niyät bulğanda baş miyeneñ närsä äytergä tırışuın belä aluıbıznı rasladıq”,-dide.