Mäskäwdäge höcümgä dönya reakśiya belderä

Terror höcüme belän teträngän Rusiyäneñ qayğısın dönyanıñ törle poçmaqlarınnan urtaqlaştılar.

Amerika Quşma Ştatları citäkçelege ilbaşı Djo Bayden waqıyğalarnı küzätep bara dip xäbär itte.

Aq Yorttan yasalğan belderüdä “Mäskäwdäge höcüm qotoçqıç, yöräklärebez qorbannar belän bergä” diyelde.

Azärbaycan tışqı êşlär ministrlığı höcümne kisken räweştä ğayepläp “Ğayepsez qorbannarnıñ ğailäläreneñ, Rusiya xalqı häm xökümäteneñ qayğısın urtaqlaşabız” dip citkerde.

Franśiya ilbaşı Êmmanuêl’ Makron höcümne ğayepläp Rusiya xalqına teläktäşlek belderde.

Berläşkän Millätlär Oyışması iminlek şurası terror ğamälen “xain häm qurqaqlarça” dip atadı.

Berläşkän Millätlär Oyışması ğomum särqatibe Antoniu Guterreş ta höcümne ğayepläde.

Germaniya tışqı êşlär ministrlığı qayğı urtaqlaşıp höcümneñ artındağılarnıñ tiz arada açıqlanırğa tiyeşlegen citkerde.

İrlandiya, Greśiya häm İran da Rusiyäneñ qayğısın urtaqlaştılar.

AQŞ soñğı atnalarda bulırğa mömkin terror höcümnäre turında Rusiya wäqalätlelären kisätüen açıqladı.

AQŞ xökümäte üz grajdannarın, konśertlarnı da kertep, keşe küp cıyılğan urınnardan yıraq torırğa öndäde.

Angliya häm Kanada da Rusiyädäge grajdannarın saq bulırğa çaqırdılar.