Fälästinne BMO ğomum şurasında tanırğa çaqırdılar

Latin Amerikası häm Karib däwlätläre cämğıyäte SELAK Berläşkän Millätlär oyışmasına möräcäğat’ itte häm Fälästinneñ ğomum şurada “tulı äğ’za” itep tanıluın soradı. Bu xaqtağı xat BMO ğomum särqatibe Antonio Guterrişqa adreslap yazıla. Anda dön’yadağı teläsä qaysı däwlät sıman Fälästinneñ dä ğomum şura cıyılışlarında barlıq xoquq häm yöklämäläre belän tanıluı kiräklege assızıqlana.

Xatta äytelgänçä, SELAKta äğ’za 23 däwlät bu mäs’älädä berdäm fikerdä. Alar Fälästinneñ BMOda tulı äğ’za itep tanıluı öçen tawışqa quyunu sorıy.  

Xatta, şulay uq, İzrailneñ 7nçe oktyabr’dän birle Ğazzä sızığına höcümnäre arqasında bik küp sanda xatın-qız häm balalarnıñ ğomere özelüe, gumanitar yärdämnärneñ kiçekmästän töbäkkä kertelüe kiräklege äytelä.