Baş miyenä çip urnaştırılğan keşe şaxmat uynadı

İlon Mask qorğan neyrotexnologiya şirkäte “Neuralink” tarafınnan baş miyenä çip urnaştırılğan keşe töşençä yulı belän şaxmat uynadı.

“Neuralink” Noland Arbonıñ şaxmat uynağan minutların X sośial’ mediada turıdan-turı kürsätte.

Arbo turıdan-turı êfirda yaqınça 8 yıl êlek hälakätkä yulıqqannan soñ qul-ayaqlarınıñ paraliçlanuın äytep, baş miyenä çip urnaştıru operaśiyaseneñ bik ciñel uzuın citkerde.

Video yazmadan kürengänçä Arbo töşençä yulı belän noutbuk kursorın xäräkät itterä häm şaxmat uynıy.

İlon Mask 30 ğıynwar könne X säxifäsendä belderü yasap, 29 ğıynwarda berençe tapqır ber keşegä “Neuralink” tarafınnan yasalğan çipnıñ urnaştırıluın açıqlağan ide.

Mask berençe “Neuralink” êşlänmäse bulğan çipnıñ “Telepatiya” isemen aluın, barı tik töşenep kenä telefon yäisä sanaqnı häm bolar aradaşçılığı belän här cihaznı diyärlek kontrol’ itep buluın äytkän ide.

İlon Mask häm ber törkem injener tarafınnan 2016 yılda qorılğan “Neuralink” baş miyenä urnaştırılaçaq mikroçiplar yärdämendä paraliç qalğan yäisä suqır keşelärne däwalawnı häm ğariplärneñ tormış sıyfatın yaxşırtunı maqsat itä.