Ğazzädä qan qoyu däwam itä

İzrail armiyäseneñ qamalış astındağı Ğazzä sızığına 2023nçe yılnıñ 7nçe oktyabrennän birle däwam itüçe höcümnärendä soñğı 24 säğat’tä ülüçelär sanı 82gä arttı häm 30 meñ 960qa citte.  Yaralanuçılar sanı isä 72 meñ 524. Bu xaqta Ğazzädäge Fälästin sälamätlek saqlaw ministrlığı belderde. Anda äytelgänçä, İzrail höcümnärendä ğomere özelüçelärneñ 72%ı balalar häm xatın-qızlar.

Soñğı 24 säğat’tä İzrail 10 qanqoyış oyıştırğan. Töne buyı tınıç xalıq yäşi torğan öylär bombağa totıla.

Ğazzädä gumanitar yärdäm kiterüçe yök maşinaların kötüçe fälästinlelärgä keşesez hawa apparatları belän höcüm itälär. Anda ülüçelär häm yaralanuçılar bar. Awır yaralı xäldä xastaxanägä iltelgän keşelär öçen kiräkle mediśina preparatları bulmawı belderelä.