Ğazzädä tağın ber jurnalist üterelde

İzrail armiyäse Ğazzä sızığında tağın ber jurnalistnı üterde. Bu xaqta Ğazzädäge xökümätneñ media xezmätennän xäbär ittelär.

Belderügä qarağanda, Ğazzädän tapşıru yasawçı “Äl-Aksa” telekanalı alıp baruçısı häm jurnalist Möxämmät Sälamä Däyr äl-Bälax şaharendä ber öygä yasalğan höcüm näticäsendä hälaq bula.

İzrail armiyäseneñ 2023nçe yılnıñ 7nçe oktyabrennän birle baruçı höcümnärendä ülgän jurnalistlar sanı 133kä citte. Älege çorda Ğazzädä tulayım 30 meñ 631 fälästinle üterelde. Alarnıñ kimendä 13 meñ 430ı balalar, 8 meñ 900e xatın-qızlar. 72 meñ 43 keşe yaralandı yäisä ğomerlek ğarip qaldı.

Ğazzädä äle haman cimereklär astında meñnärçä üle barlığı belderelä.