11 yäş'lek qız Ğazzädän dön'yağa möräcäğat' itte

Ğazzä sızığınıñ kön’yağındağı Cibaliya möhacir lagerında 11 yäş’lek Rahaf äl-Mukayyäd İzrail köçläre cimergän öyläreneñ qaldıqları yanınnan dön’yağa möräcäğat’ itte. Ul islam dön’yası ramazan ayına äzerlängän bu könnärdä Ğazzä xalqınıñ açlıqtan häm suıqtan ülüen söyläde.

Rahaf İzrail höcümnäre başlanğan 7nçe oktyabr’dän alda, uquınnan tış, jurnalistika häm diktorlıq kurslarına yörgän. Suğuş başlanu belän bergä anıñ kiläçäkkä bäyle barlıq plannarı cimerelgän. Qız Ğazzäneñ yäşäp bulmaslıq urınğa äwerelüen äytä.  

“Sez bolarnı telekanaldan yäisä telefonığızdan qarıysız, tik üz küzläregez belän kürmisez. Bez isä barlıq bu cimerelülärne küräbez häm qurqınıç tawışlarnı işetäbez”,-di ğazzäle qız. Ul xalıqara cämäğat’çelekneñ Ğazzädäge xällärgä bitaraf qaluına reakśiyä belderde.

Rahaf möselmannarnıñ ramazan ayına äzerlänüen xäterlätep bolay dide: “Sez säxär häm iftarda aşayaçaqsız. Närsä aşasaq dip uylayaçaqsız.  Ä bez aç. Ğazzä xalqınıñ açlıqtan ülep betüe turındağı xäbärne kötäsezme? Bezgä bügen yärdäm itmäsägez, qayçan itäçäksez?”