Naval'nıynıñ ülemenä qağılışlı rizasızlıq däwam itä
Bu nisbättän törle illärdä Rusiyä ilçeläre tışqı êşlär ministrlıqlarına çaqırıldı
Böten dön’yada Rusiyä oppoziśionerı Aleksey Naval’nıynıñ 16nçı fevral’dä törmädä ülüenä qağılışlı rizasızlıq däwam itä.
İtaliyada Rusiyäneñ Rimdağı ilçese Aleksey Paramonov älege nisbättän tışqı êşlär ministrlığına çaqırıldı. Aña säyäsi êşçänlege häm rişwätçelekkä qarşı köräşe säbäple bik awır şartlarda törmädä totıluçı Naval’nıynıñ ğomere özelüe belän bäyle barlıq şartlarnıñ açıqlanuın kötüläre belderelde. İtaliyä tışqı êşlär ministrlığınnan yasalğan belderüdä mondıy yullar bar: “Bäysezlek häm demokratiya şikelle kire qaqqısız qıymmätlärne yaqlawçı İtaliya, başqa Awrupalı xezmättäşläre şikelle ük, Rusiyäne säyäsi oppoziśiyäne êzärlekläwdän tuqtarğa, grajdanlıq häm säyäsi xaqlarda bernindi çikläwlärsez süz irege xoquqın garantiyälärgä çaqıra”.
Çexiyä dä Rusiyäneñ Pragadağı ilçese Aleksandr Zmeyevskiynı, oppoziśionernıñ üleme säbäple, tışqı êşlär ministrlığına çaqırdı. “İlçe Naval’nıynıñ üleme belän bäyle detal’lär häm wäqalätlelärneñ mäyetne ğailäsenä tapşırudan baş tartuı wäzğıyäten açıqlaw öçen çaqırıldı” -dide Çexiyä tışqı êşlär ministrlığı süzçese Daniêl’ Dreyk.
Awrupada Niderland, Norvegiyä, Şveśiyä häm Angliyä dä Rusiyäneñ üz illärendäge ilçelären tışqı êşlär ministrlıqlarına çaqırdı.
