AQŞ İzrailneñ höcümnären tikşerä
Amerika üze birgän qorallarnıñ tınıç xalıqnı üterüdä qullanıluına şöbhälänä
AQŞ däwlät departamentı İzrailneñ Ğazzä sızığında distälärçä grajdanlınıñ ülemenä säbäpçe hawa höcümnäre belän Livanda aq fosfor qullanuı oçraqların tikşerä.
“Wall Street Journal”nıñ AQŞ wäqalätleläre süzlärenä nigezlänüçe xäbärenä qarağanda, Amerika İzrailgä birgän qorallarınıñ tınıç xalıqnı üterü öçen tiyeşsezçä qullanıluın açıqlarğa tırışa. Süz 31nçe oktyabr’dä Cibaliya lagerenä oyıştırılğan häm 125tän artıq keşeneñ ülemenä kitergän hawa höcüme turında bara. Anda AQŞtan täêmin itelgän yaqınça 907 kilogramm awırlığındağı bomba qullanıluınnan şöbhälänälär.
Däwlät departamentı süzçese Mêt’yu Miller bu xaqtağı xisap belän bäyle sorawğa ministrlıqnıñ keşe xoquqların bozu häm grajdanlılarğa zarar birgän waqıyğalarnı “Tınıç xalıq arasında qorbannar oçraqların tikşerü qullanması” prośessı yärdämendä analizlawların rasladı. Ul älege tikşerügä duçar bulaçaq waqıyğalar xaqında mäğ’lümat birmäde.
