Ukrainada tınıçlıq urnaştıru ciñel bulmayaçaq
BMO problemanıñ tamırın 2014nçe yıldan uq êzlärgä çaqırdı
Berläşkän Millätlär Oyışması Ukrainada bäreleşlärneñ tuqtatıluı häm tınıçlıq urnaşuı öçen ber kileşüneñ genä citärlek bulmayacağın, problemanıñ tamırına qadär töşärgä kiräklegen belderde.
BMO ğomum särqatibeneñ Awrupa, Urta Aziya häm Amerika buyınça cawaplı urınbasarı Miroslav Yença İminlek şurasınıñ Rusiyä taläbe nigezendä oyıştırılğan Ukraina temalı utırışında äğ’za illärgä mäğ’lümat citkerde. Ul Rusiyäneñ Ukrainağa bärep kerüenä tizdän 2 yıl tulaçağın xäterlätte häm, ikençe yaqtan, ildä bäreleşneñ 2014nçe yıllarğa uq barıp totaşuın onıtmasqa kiräklegen assızıqladı.
Yença Ukrainadağı suğışnıñ artuçı dähşäte häm tınıç xalıqqa yoğıntısı öçen borçıluların, torğan sayın ğadel häm daimi çişeleş tabunıñ awırlaşuın belderde. “Tınıçlıq kileşüeneñ berüzeneñ genä suğışnı beterü öçen citärlek bulmayacağın beläbez. Solıx prośessları problemanıñ tamırına qadär töşärgä tiyeş,”-dip kisätte ul. Yença cämğıyät’neñ barlıq öleşläreneñ prośessqa tigez räweştä kertelüeneñ ähämiyäten assızıqladı.
