Borrel' İzrailgä qoral satunı tuqtatırğa çaqırdı

Awrupa Berlege tışqı mönäsäbätlär häm iminlek säyäsäte yuğarı wäkile Jozef Borrel’ İzrailgä qoral satunı tuqtatırğa çaqırdı. Ul Bel’giyä başqalası Brüssel’dä uzğan ber cıyılıştan soñ belderülär yasadı.

Borrel’ Ğazzädä här kön artuçı ülemnärgä rizasızlıq belderüçe illärgä möräcäğat’ itte. “Ägär bik küp keşeneñ üterelüenä ışanasız ikän, bälki dä bu qadär küp keşeneñ üterelüen buldırmaw öçen İzrailgä qoral satunı kimetersez. Härkem Tel’-Avivqa barıp yalwara: “Bolay êşlämägez, tınıç xalıqnı saqlağız, bu çaqlı küp keşene ütermägez”,-dilär. Tik (İzrail xökümnäte räise) Netan’yaxu berkemne dä tıñlamıy”,-dip söyläde räsmi zat.  

Borrel’ İzrailneñ Räfax töbägenä höcüm planı xaqında da söyläde. “Keşelär êvakuaśiyälänäçäk ikän. Qaya? Ayğamı? Bu keşelärne qaya küçeräçäklär? Xalıqara cämäğat’çelek monıñ bik küp keşeneñ ğomeren özäçäk ütereş bulaçağın belä. Bälki dä İzrailne qoral belän täêmin itüläre turında uylarğa kiräkter. İllär “Bik küp keşe üterelä, zinhar, keşelärne uylağız, zinhar, bu çaqlı keşe ütermägez” diyüen däwam itä. “Zinhar” diyüdän tuqtağız häm berär närsä êşlägez”,”-dip yarsıdı Borrel’.

İzrailneñ Ğazzägä höcümnärendä 29 meñgä yaqın fälästinle üterelde. Alarnıñ kübese bala.