İzrail Livanğa höcüm itte

İzrail armiyäse Livannıñ kön’yağındağı çik buyı töbägenä ber-ber artlı hawa höcümnäre oyıştırdı. Bu xaqta Livannıñ räsmi xäbär agentlığı NNA citkerä. İzrail oçqıçları çik yanında uq urnaşqan Tel äl-Avayda cirlegenä ike hawa höcüme yasıy. Şunnan soñ Äl-Xiyam häm Marun är-Ras punktlarındağı buş yortlarğa ut açalar.

İzrail köçläre 4 aydan artıq Livannıñ kön’yağındağı 120 çaqrımlıq çik buyında urnaşqan awıl häm rayonnarğa höcüm yasıy. Näticädä ul tirädä yäşäwçe 80 meñläp livanlı yäşägän urınnarın taşlap kitte.

İzrail armiyäse belän “Xizbullax” xäräkäte arasında 2023nçe yılnıñ 8nçe oktyabrennän birle baruçı bäreleşlärdä 188 “Xizbullax” äğ’zası, 8 “Ämäl” xäräkäte äğ’zası, 31 Livan grajdanlısı, 2 Livan xärbiye, 6 izraille grajdanlı häm 10 İzrail ğaskäriye ülde.