Finlyandiya Rusiyä belän çiklären açmıy

Finlayndiyä tärtipsez migraśiya ağımın buldırmaw öçen Rusiyä belän ike aradağı çikne yabu qararın 14nçe aprel’gä qadär ozaytuın citkerde. İlneñ êçke êşlär ministrı Mari Rantanen başqala Xel’sinkida oyıştırılğan matbuğat cıyılışında çığış yasadı. Ul Rusiyädän migraśiyäneñ Finlyandiyäneñ milli iminlege häm cämäğat’çelek tärtibe öçen citdi yanaw tudıruın söyläde. Şuña kürä çik 14nçe aprel’gä qadär yabıq qalaçaq.

Xel’sinki Rusiyädän kilüçe sıyınuçılar ağımın Mäskäwneñ “gibrid operaśiyäse” bularaq bäyäläde. İke il arasında atnalar buyı däwam itüçe kiyerenkelektän soñ Finlyandiyä 28nçe noyabr’dä Rusiyä belän barlıq çigen waqıtlıça yaptı. Çik kiçeşläre 15nçe dekabr’dä qısqa ğına waqıt öçen açılsa da, wäqalätlelärneñ ilgä bik küp migrant kerüen belderüennän soñ şul uq könne kiçke säğat’ 8dä yabıldı.