Yarğa çıqqan mäyetlärne yandıraçaqlar

Kön’yaq Koreya üz yarlarına dulqın çığarğan Tön’yaq Koreyalılarnıñ mäyetlären yandıracağın belderde. Wäqalätlelär moña Pxen’yan belän êlemtä kanallarınıñ yabıq buluın säbäp itep kürsätä.

Yar buylarında tabılğan häm tapşırılmağan mäyetlär DNK testı yasalğannan soñ röxsät kötmiçä yandırılaçaq.

“Yonhap”nıñ xäbärenä qarağanda, Kön’yaq Koreya berläşü ministrlığı yarğa çıqqan Tön’yaq Koreya watandaşlarınıñ mäyetlären êlek tuğannarına tapşıra ide. Uzğan yıl aprel’ häm sentyabr’ aylarında yasalğan möräcäğat’lärgä Pxen’yan idaräse cawap birmägän. Mäyetlär şunnan birle cıyılıp kilgän.

Ministrlıq şäxes açıqlaw prośedurası öçen 2014nçe yıldan birle Tön’yaq Koreya ğailäläreneñ DNK mäğ’lümat bazasın tutırıp bara.