Rusiyä belän Ukraina ber-bersen ğayepli
Kiçä Rusiyäneñ Belgorod şähäre östendä bärep töşerelgän oçqıç öçen ber yaq ta cawaplılıq almadı
Rusiyä belän Ukraina Belgorod şähärendä kilep töşkän oçqıç nisbätennän ber-bersen ğayepli. Mäskäw kiçä 74 keşe ülgän waqıyğada Kiyevnı cawaplı dip belderde.
Kreml’ süzçese Dmitriy Peskov ukrainalı 65 äsirne dä kertep 74 keşe utırğan Rusiyä oçqıçın Ukrainanıñ bärep töşerüen “qurqınıç ğamäl” dip bäyäläde. Ul BMO İminlek şurasın älege mäs’äläne qaraw öçen aşığıç cıyılırğa çaqırdı.
Ukraina däwlät başlığı Volodimir Zelenskiy isä oçqıçnı Mäskäwneñ bärep töşerüen alğa sörä. Ul, sośial’ media aşa belderü yasap, mäs’älä xaqında Ukraina saqlanu ministrı, ğomumştab başlığı häm küzläw wäqalätleläre belän söyläşüen citkerde. “Ruslar ukrainalı äsirlärneñ tormışı häm tuğannarınıñ xisläre belän uynıy. Ukraina cämäğat’çelegenä basım yasarğa telilär,”-dide Zelenskiy. Ul qullarındağı dälillär belän urtaqlaşaçaqların assızıqladı häm xalıqara tikşerü taläp itte.
İsegezgä töşeräbez, kiçä Rusiyäneñ Belgorod töbägendä kilep töşkän İl-76 törendäge Rusiyä oçqıçında bäreleşlärdä äsir alınğan ukrainalı 65 ğaskäri, 6 keşelek êkipaj häm 3 ozatıp baruçı buluı, berseneñ dä isän qalmawı belderelde.
