Bolgariyada yaña NATO ob'yektları tözelä
Alar 5 meñgä qadär xärbi xezmätkärne sıydıraçaq
Bolgariyä saqlanu ministrı Todor Tagarev ildä ixtiyac bulğanda 5 meñgä qadär NATO xärbi xezmätkären sıydıru öçen kiräkle asqorma êşçänlekläreneñ başlanaçağın belderde. Ul ber şäxsi telekanalğa interv’yusında äle yaña ğına AQŞqa yasağan säfären bäyäläde. Anda NATO ob’yektları xaqında da süz bula. Älege qorılmalar häm asqormanı tözü 6 milliard yevroğa töşäçäk dip uylanıla. Ul AQŞ, NATO häm Awrupa Berlegeneñ törle fondlarınnan alınaçaq.
Tagarev beldergänçä, NATO xezmätkärläreneñ ixtiyacları öçen äzerlänüçe ob’yektlardan tış avtotrassa, timer yulı tözeleşe häm başqa êşlär küzallana. Ul ittifaq’ qısalarında kertelgän iminlek çaralarına da qağıldı.
“NATOnıñ könçığış flangı illärendäge barlıq (küpmillätle) suğış törkemnären brigada törkemnärenä küçerü planlaştırıla. Batal’onnardan brigadalarğa äwerelgän älege törkemnärneñ härbersendä 5 meñgä qadär keşe bulaçaq. Bu kiräk bulğanda tormışqa aşırılaçaq, xäzerge waqıtta tögäl datası yuq. Monıñ öçen şartlar tuıdırırğa äzer bulırğa kiräk”,-dip söyläde ministr.
