Ğazzädä açlıq

7nçe oktyabr’dän birle İzrailneñ köçle höcümnäre astında yäşäwçe Ğazzä sızığında 2,2 million keşegä qıtlıq yanawı belderelde.

BMOnıñ gumanitar êşlär koordinaśiyäse ofisı Ğazzädä azıq-tölek citmäwçelek arqasında kilep çıqqan krizis turında mäğ’lümat birde. Anda äytelgänçä, 378 meñ keşe, “Azıq-tölek qurqınıçsızlığı integral’ êtap klassifikaśiyäse” nigezendä qarağanda, “hälakät” dip ataluçı 5nçe däräcä açlıqta yäşi. 939 meñ keşe isä “ğadättän tış xäl” dip ataluçı 4nçe däräcädäge açlıqnı kiçerä. İzrail höcümnäre arqasında töbäktä 1 million 900 meñ keşeneñ yäşägän cirennän küçenüe häm bolarnıñ küp öleşeneñ iske-mosqıdan qorılğan çatırlarda yäşäwe assızıqlana.