Amerika Ukrainağa süz birde
AQŞ däwlät särqatibe Êntoni Blinken Ukrainağa alğa taba da teräk bulaçaqların belderde
“AQŞ alğa taba da Ukrainağa teräk bulaçaq, Awrupa da şunı uq êşläyäçäk”. Amerika Quşma Ştatları däwlät särqatibe Êntoni Blinken älege süzne Ukraina däwlät başlığı Volodimir Zelenskiyğa Davostağı iq’tisad forumındağı söyläşüläre waqıtında birde.
Zelenskiynıñ ofisınnan yasalğan belderügä qarağanda, oçraşuda AQŞ milli iminlek kiñäşçese Djeyk Sallivan häm maxsus wäkil Penni Priśker qatnaştı.
Anda Ukraina häm AQŞ arasında saqlanu tarmağında xezmättäşlek, Ukrainanıñ hawa saqlanu sistemaların nığıtu, Kiyevqa yıraq arağa atuçı qoral cibärü şikelle mäs’älälär kütärelä. Ukrainağa, bigräk tä, qoral citeşterü öçen xalıqara investiśiyälärne cälep itü dä kön üzägendä bula.
4 ay êlek AQŞ däwlät başlığı ofisı Kongressqa 2024nçe yılda Ukraina häm İzrail’gä yärdäm öçen östämä byudjet bilep birü nisbätennän räsmi üteneç cibärde. Älege üteneç häm bäyläneşle qanun ölgeläreneñ yazmışı älegä bilgesez.
