Bay belän yarlı arasındağı upqın zuraydı

Sonğı yıllarda bulğan krizislar häm suğışlar dön’yada baylar häm yarlılar arasındağı upqınnı tağın da tiränäytte.

Xalıqara yärdäm oyışması “Oxfam”nıñ Davostağı Bötendön’ya iq’tisad forumı başlanğançı çığarğan ber tikşerenüenä qarağanda, dön’yadağı iñ bay 5 keşe - barısı da ir-at - 2020nçe yıldan birle mal-mölkätlären 2 tapqırdan da kübrk arttırdı. Şul uq waqıtta Cirdäge xalıqnıñ iñ yarlı 60%ı, yäğ’ni yaqınça 5 milliard keşe tağın da fäqıyr’läşte.  

Tikşerenü törle çığanaqlarğa tayana. Mäsälän, “Oxfam” oyışması “Forbes”nıñ milliarderlarnıñ mölkäte turındağı farazların “Credit Suisse” bankınıñ global’ baylıq farazları belän berläşterde.

“Oxfam” mäğ’lümatlarına qarağanda, iñ bay 5 keşe 2020nçe yıldan birle säğatenä urtaça 14 million dollar kerem aldı. Ul waqıttağı mölkätläre tulayım 405 milliard dollardan 869 milliard dollarğa citte. Barlıq milliarderlarnıñ baylığı inflyaśiyä däräcäsennän öç tapqır tiz üste.  

Şul uq waqıtta iñ yarlı 4,77 milliard keşe 2020nçe yıldan birle tulayım 20 milliard dollar külämendä mal-mölkäten yuğalttı. “Oxfam” citkergänçä, 791 million êşçeneñ xezmät xaqı inflyaśiyä belän bertigez atlıy almadı. Urtaça alğanda, härberse 2 yıl êçendä ber aylıq xezmät xaqın yuğalttı.